বুট জোতা।। বাসু দেব চাক্‌মা

Print Friendly

এক্কান মুরোল্লে অদাম,নাং মানেক্ক্যো ছুড়ি । পুগোন দি বর বর বিল,সে পরেন দি বরগাঙ । পজিমেন দি যিদ্দুর চোগোত পরে হালা হালা অজল মৌন ।পজিমেত্তুন ধুরি পুগেন দি আদাম্অ ময্দ্দেন দি গুরি এক্কান ছড়া লামি যেয়ে । ছড়াআ ন নাং মানিক্কো ছড়া । এ ছড়া ন নাংআনত্তুন আদাম অ নাং আন ওয়ে দে মানিক্ক্যো ছুড়ি ।

বুড়োবুড়িত্তুন সুন্নে হোদা,ভালুক বজর আগে,বর-গোধা ওনেই এ জাগানত্ যেক্কে নৌ পোরোঙে এচ্চোন সেক্কে বেলে এ ছড়ানর এক মাদাত্তুন আরেক মাদাত এক জুর হালাজামুরো সাবে মানেক মুওত গুরি লোইবেরেদাক,সনত্তে ছড়াআনর নাং থোই ডোন্নে মানিক্ক্যো ছড়া । ছড়া পাড়ে পাড়ে চিগোন ডাঙর মুরো,সেরে সেরে এক্কা-উক্কু থল জাগা । এ মুরোউনোত মানুচ্চুনে ঘর তুলিনেই আদাম বানি আগন । গোদা আদামানত ডাঙরে-চিগোনে মিলিনেই ৮-১০সো নাঙেল । এক নাঙেলত ১৫-২০ গিরি(পরিবার) থান ।

পুগেন দি বর নাঙেল্লো থুমোত আদাম হারবারি জিত্তো হারবাজ্জে ঘর । চিগোন চাগোন মুরো,এগেলা এক্কান ঘর । টোন মাজ্জে,অর্ধেক দেবাল আ তলা পাক্কা । ঘর্অ সাজিত লাম্বা ইক্কো মরা বাজ্জে বাজ এক ঠেঙে থেই আগে,মাদাত টিভি এন্তেনা । সিংগোবা দোরো দি ধাগেন দি দিবে সত্রং ফুলো ডুবো,হূদ্দুর দুরোত ইক্কো বর সেমেই গাজ । দেলে বুঝো যায় ইয়ান ঠাগোয়ে মানজো ঘর । ঘর অ তলে এক্কান থল জাগা,সিয়োত এক্কান পাগন দি হ্মেত ।

বেল মাধা উগুরে উত্তে,আদাম্মেউন হামত্তুন ফিত্তোন । ঘরঅ পিজুরোন্দিত্তুন ইক্কো সিগোন গুরো ধাবা ধাবা ঘরঅ তলে পাগোন দি হ্মেত্তানন দি যায় । লগে দিবে হুগুর ! কালা ইক্কো আর ধল ইক্কো,ঢিয়ে….ঢিয়ে…ধে..ধে……গুরি সিগোন গুরোবো র সারে । ম্যাঁ,ম্যাঁ গুরি ৪-৫ সো ছাগল হেদত্তুন নিগিলি যান । গুরোবো ঘরত এজে,পিজোরো হুরে এনেই ধল হুগুর বো পুন সে এক লাদি দিনেয় হয় মোরালাক্কে ভুচ্চো হুগুর ।
হুগুরুন অলাক্কে কারবাজ্জের,হালাবো নাং ভালুক্কে আ ধল লো নাং আহ্ত ধোবা । ভালুক্কে অমহদ টাকটাক্কে আ আত ধোবা ভুচ্চো । গুরোবো তাম্মারে হয়,মা অনি ভালুক্কেরে দক মদ হাবেয়ো দে ?তাম্মা আজিনেই হয়,আহেত্তে দক মদ হাবেদও যিউন জেত অবার সিউন এনে জেত অন ।

গুরোবো তা ধগে তে গায় গায় হারা হয় । হাক্কন থেনেই তারা দু ইক্কো পরমা মিলে এজে,সেত্তেরা মা । বুগত হাদি নেই,হাচ্চোং গুরি পিনোন পিন্নে আ পুন ঝারিলে ধুল উরে । এ সেত্তেরা মারে গুরোবো এক ফুদো দে নপারে ! গুরোবো নাং সধক,কারবাজ্জে পো । সেত্তেরালই তারা এক সমাজ্জে ৭-৮তো বজর বয়স । গুরোবোরে দেনেই সেত্তেরা মা পিজের গরে হি হবর সদক ?সদক্কে মুয়ান পিচ্চেনেই সিংগোবান দি ধাবা দে ।সেত্তেরা মা পিজুরো দোরানত ভেক গুরি বজে । সধক্কে মা হয় আহি সৌত বচ্চৌচ ? ইয়ৈত বজ না,পিড়ে এক্কান ঠিলি দে । দি জনে হাক্কন সুগ দুগো হধা হন । হদা হদে হদে সধক্কে মা গুদি ভিদিরে যায়,হাক্কন বাদে ৫-৬বো আতপুরন্নে পেন সুলুমবোই নিগিলি এজে । সেত্তেরা মারে হয় ইউন সেত্তেরা বাবরে আর এ সুলুম উন সেত্তেরা রে নে জে দিস । সেত্তেরা মা হুজি অয়,ঘরত যেবাত্তে উদে যাদে যাদে হুদ্দুর জেনেই আর ফেরত এজে ।সধক্কে মারে হয়,ভুজি ভুজি থেলে একটোন ইজেগুরি দেনা সেত্তরা বাবে ইক্কো হুমুরো হিনি আন্নে দে,ঘরত ও রুচ্চোল এক্কা পাদল ওয়োন । সধক্কে মা কাবচ্চোয় মজা গুরিনেই সেত্তেরা মারে দেগি,সেত্তেরা মা তারা ঘরন দি যায় আ সদক্কে এক রিংএ গুরি চে থায় । তে বুঝি নপারে তাম্মা হেত্তে সেত্তরা দাগিরে এধক্কানি জিনিস দে ! সেত্তরা দাগিদ গরিব উদোর ললেও জীবনত বেক্কানী সুজি নবারন । গায় সেত্তেরা মা নয় হুরে হারে বেক্কুনোরে তাম্মা যিদ্দুর পারে চায় । সধক্কের মনে মনে তাম্মা উগুরে বিরক্ত অয় । কয়েক পল্লা তম্মাত্তুন পিজের গুরিনেই তাম্মা হয়ে আদামমে পারাল লে বেক্কুন হামত লাগন হিন্তু তে বুঝি নবারে যে মানুষ সো মানজত্তুন রুচ্চোল উদোর মাঘি পায় সিবে হেনে তারারে বল দিদো !

এক দিন দি দিন গুরি হয়েক মাজ বিদি যায় । এক দিন বেল্লে অকতত্ সধক্কে তা সমাজ্জেউনদোয় ঘিলে হারা হেলার,সেত্তরা সুত্তো তারা এক হুরোত । সেত্তরা ইক্কো নো সুলুম উচ্চে দোকদোক্কে গুরি আলগে চিন পায় । সেত্তেরা অমহদ হুজি,সধক্কেলই তাম্মা বাজারত যেনেই এ সুলুম্মো আনি দোনদে ।

গেল্লে মাজ হদা,সধক্কে গায় গায় ছড়া পারত হারা হর । লুদিত বাজি এক্কান সেন্ডেল পানিত পরেগই ।মুরোল্লে গুরো সাজুরি নজানে,সেন্ডেলান হোজা জেনেই সিয়ান লগে লগে তেও মরংঅত পরেগই ।হয় ধুক যে হুলুক পানি হে পেয়ে ইদোত উদিলে এজ হিয়ে গিরগিরে উদে ।ভাইজগো ভালা,সেত্তেরা মা দেক্কে নলে এধক্কন পানি তলাত তারে পুদি মাজে হেলাক্কুন ।

পরেন দি সধক্কে তাম্মাত্তুন শুননে সেত্তেরা মা নঅধ তে নবাজিলুন,পানি হেনেই তা পেত্তো ভেলে বারিজে হুদুগুলো ধক ওয়ে ।তার হন উজ নএল পেদত্তুন পানি নিগিলি যেনেই তে উজ ফিজ্জেদে ।সিত্তুন ধুরি তে বুঝি পারে আদাম বেক মানুষসুন গরিব অলেও নানা হিত্যে হামত লাগন ।
সধক্কে আর বারবো গুরি নথায়,ইক্কুনু সেত্তেরা মা তারে হন এক্কান হধা পিজের গল্লে তে আজি আজি হদা হয় ।তে বুঝি নপারে সেত্তরা মা আঙোর আজি বোয়ো তার ইক্কে গম লাগে ! গেলদে হেল্লে তাম্মা লগে বাজরত যেনেই তে নিজে তাম্মারে হোনেই সেত্তেরাত্তে সুলুম আনি দি ।

সধক্কে দিন্নোবো হারা হেলেনেই রেদত ঝাদি ঝাদি ঘুমত পরে । রেত সম্ভাগত তা বাব র শুনি তার ঘুম ভাঙি যায় । ঘুমো বিদিং-বাদাং শুনে তা বাবে হত্তে মুই ও বাবর পুত ! এক পয়জেও দিদুং নয়,ইগুন হন মানজো টেঙাও নয়,সরকাজ্জে টেঙাও নয় ! ইগুন মুই ভালুক বজর ধুরি ম বাগান আম,হাত্তোল বিজিনেই পেয়ে টেঙা,ন হেনেই ঠোয়োঙে আদামত এক্কান ইস্কুল বোজেবাত্তে ।সধক্কে আগামাদা হিচ্চু নবুজে,তা বাবে এজ হই যার আদামমে পোগুনে বারিজে লক্কে পেক-ফুট উরি উরি অননো আদাম ইস্কুলত যাদে অমহদ দুগ পান…….
সধক্কে চক্কুন বুদি পরন দি,উরঘুমোর উরঘুমোর গুরী তাম্মারে ও হধা হদে শুনে ।

ফদাংতাং অনেই সেত্তেরা তারে আদাম বটগাজসন দি বেরেবাল্লোতে হোজা এজে,সধক্কেরে দিবে বুক্কোরাঙা গোয়েম আনি দে । সধক্কে সেত্তেরাত্তুন শুনি দোলে হবর পায় অদামত এক্কান ইস্কুল উদের,খরচ সধক্কে বাপপো দের । আত্ তে আত্ তে বটগাজসত এজন চানদে ভালুক্কুন মানুজ থুবেয়োন,বেক্কুনে খুজিয়ে রাজিয়ে হাম গত্তন ।

এচ্চে এক্কা হেল্লে এক্কা গুরী ভালচ্চোমান জাগা সং গরন । দেক্কে দেক্কে ইস্কুল তুলনা শুরু অয় ।ঘর তুলিয়ে মানুজ এজন,ঘর অ থুনি,বের বাজ,বেক্কানি এজে । বেল্লে অলে সিগোন গুরোউন সোত যেনেই হারা হন্দোয়,ডাঙর উনে বাগ হামত্তুন এত্তে যাদে হমরত আত্ দিনেই রিনি চে চে যান । সধক্কেত্তুন ও বারী গম লাগে ।মনে মনে ঠিক গরে ডাঙর অলে তে ও তা বাব ধক্কে গুরি হাম গুরিবো । আদাম মানুজসুনোরে বল দিবো,আদামত এক্কান ও শন সিলেনী ঘর নঠেব বেক্কুনে লেগা পরা পারন,হামত বল দে দি গরন,ধরাধজ্জে গুরি থান । দঘিনেনদিত্তুন এক ঝোলগা বয়ের এজে,হিয়েআন জুরে নেযায় তাত্তুন বারী গম লাগে ।

এক মাজ দি মাজ গুরি ৫-৬মাজ পার ওই যায়,ইস্কুলান সারা অয় । বার আদামত্তুন ইস্কুলোত্তে মাস্টর ঠিগ গরন । বিজুর আর বেজ দিরি নেই,বেক্কুন জিরেন নেয়ে যা ঘর তে গুচ্চোদন । পুরোন বজর ফি ফেলে দিনেই নো বজর বোরে পাততুরুতুরু জানেবাত্তে ঘরপত্যি যুগোল অদন । এক দিন বেল্লেমাদান বেক আদামমেউনে ইস্কুলোত থুবো অন,বেক্কুনে মিলি ঠিক গরন নুও বজরত নুও ইস্কুলান ফোগোদাং গুরিবাক ।

কারবাজ্জে ইগিলে এক্কা চিদেত আগে । ঘন ঘন হবর পাদাদন,দি পল্লা চিদি এচ্চে ।আদত বেজ টেঙা নেই,ইস্কুলান বানেবাত্তে তে যে টেঙউন ঠোয়ে সিগুনে নহুলোন । মানজোত্তুন টেঙা উদোর লোই পেয়ে,তো তাত্তুন গম লাগে আদামানত এক্কান ইস্কুল ওয়ে । সধক্কে মা অক্ত অক্ত পিজের গরে আ সধ্ক্কে বাপ আ হি ওয়ে,আহি সেদক মোংসা গুরি থাচ ? কারবাজ্জে ব নিজেজ ইক্কো ইরি দে সুগুনো গুরি আজিনেই হয় আ হি অদ এনে বই আগঙে আয় ।

সধক্কেলই সেত্তেরা ও একফুদো জিরেন নেই ! বিজু লক্কে হা হা ঘরত যেবাক,হি হি গুরিবাক সে চিদে গত্তে গত্তে তারার দিন মাদান থুম অর ।

চাদে চাদে বিজু দিন এজে,ফুল বিজুত আদামান অমহদ দোল লাগে,বেক ঘরআনি ফুল্লোই সাজেয়ে । বেন্নে পত্যে গাঙত গাবুর মিরেউনে ফুল ভাজে দন্দোই ।ফদাংতাং অবার আগে সেত্তেরালই সধক্কে ফুল তোগাত্তুন লুঙোন দি । যা ঘর তে সাজান,তাম্মা মানা গজ্জে তো সধক্কে তারা হুগুরুনোরে ফুলো মালা পিনে দে ।

ফুল বিজু সিজ যে মুল বিজু এজে,বেন্নে পত্যে সধক্কে তা সমাজ্জে লগে বেরা লামে । বিজু দিন সধক্কে মা হিচ্চু নহয় । সধক্কে দাগি ঘরে ঘরে যেনেই অয়… অয়….গুরী হুরো আধার দোনদোয় । বেল উদিলে হইল্লে ভরন গুরি কলা পিদে,বরা পিদে,সান্নে পিদেলোই ঘরত এজে ।
সধক্কে দাগি ও বিজুত ভালুক পথ গরন । এবারত সধক্কে মা হাত্তোল,আলু,তারা,আঙোর মাজ আ সুগুনো সেমেই ফুল্লোই পাজন তোন রান্নে । দিন্নোবো ঘরে ঘরে বেরাবিরি গরন । রেদোত মদ হেয়েউন পাল ঠিগে লামন,গান গান,নাজন । সেত্তেরা বাবে বেজ দিরি ন অয় ঘরত এচ্চেদে,এনেই বাজোন-হোদোরা বাচ্চে বাচ্চে গান গার,
এচ্চে দিন্নো মদ হেবার হি সুগোর দিন এল….,…হোয় নবাল্লুং হেনে হেনে এচ্চে দিননো সেজ অল ।

কারবাজ্জেও নানা জাগা ঘুরিনেই ঘরত এজে । আজি রঙে ইক্কো দিন সেজ অয় ।রেত সম্ভাগ,লাগা লাগা মদ হেয়ে মানজো র বাদে হিচ্চু শুনো নযায় ।

পত্যে আমল্লে কারবাজ্জে হুগুরুন ডুগুরি উদোন ।কারবাজ্জে জোগার পারে নিঁয়েয় ..,এজ জুরো ন অন বু ! হুগুরুন জুরো অন ।
গমে সেরাং-মেরাং ন অয় কারবাজ্জেরে উদনত্তুন মানজে ডাগন দি । চোখ পুজি পুজি দোর হুলিদিবাত্তে যায,সধক্কে মা ঘুমে ঘুমে দোর হুলি দে দে শুনে ।

হাক্কন পর সধক্কে মার উব এজে,সধক্কে বাবে দ ভালক্কন অল বারে যেয়ে দে এজ নফিরে ! সিংগোবাত এনেই চায় দোরান হুলো,পরান সিগুত গুরি উদে । ঘর হুরে সত্রং ফুলো ডুবোউন ভাঙা,উদন পারত দিবে হুগুর মুওত গানজাহানি বেরেয়ে গুরী সরল অনেই আগন ।

ঠিক দিবুজ্জে,আদাম বেক মানুষসুন ইস্কুলানত থুবেয়োন,জিত্তো কারবাজ্জে বাদে ।বেক্কুনো চেঙেরা ঘর পুরি যেয়ে মানজো ধক,হার মুওত নো বজর আজি নেই,বেক্কুনে চা সি গুরি বই আগন । ভালুদ্দুরোত দিবে হুগুর আঁউউউ……গুরি রোং হারি উদোন,সধক্কে সিন্দি ধাবা ধাবা যায়,দগিনেনদিত্তুন বয়ের এজে সুলুম্মো বয়েরত পল্লাত পল্লাত গুরি উরে সিগোন হিয়েআন বয়ের ফারি ফারি মুজুঙেন দি যায় । দুরোত চোগোত পরে ভালুক্কেলই আত ধোবা ছড়া পারত আগন ।সধক্কে হুগুরুনো হুরে এনেই দেগে দি বে হুগুরে এক জুর ঠেং অ হুজ চুমি চুমি লেজ বিচ্চোন আ সে ঠেংঅ হুজসো হুরেহারে পোরাক পোরাক গুরি ভালোক্কানি বুট জোতা দাগ ।।

Share This Post

One Response to "বুট জোতা।। বাসু দেব চাক্‌মা"

  1. এইদ’ হিল চাদিগাঙ’র ইতিহাস।সাহিত্য রচিত অব যুগ যুগ ধরি। বর্তমান প্রজম্মে লিগিলেই পরবর্তী প্রজম্মই জানিবাক।সচেতন অয় নিজ’র উন্নতিত্তেই এন্দক্যাগরি লেগি যা পরিব বেগত্তুন। চাঙমা কধা আ সাহিত্য কত্তমান যে রিচ- শুনিলে, মাদেলে, চরচ্চা গরিলে তে বুজি পারা যায়। বাসুদেব’র এই লেগাবুয়াত তুমেন্দি ফুদি উত্তে হিল চাদিগাঙ’র করুন চিত্র। বাসু লেগি যা , যেদক লেগিবে; সেদক পারিবে।।

    Reply

Post Comment

Please Answer.. * Time limit is exhausted. Please reload CAPTCHA.