নুন এজানা পজ্জন। দীপক চাক্‌মা

Print Friendly

নুন এজানা পজ্জন

 

বালোক বজরর আগর হোদা, যেক্কে সত্য যুগ এল। এক আদামত বিলে দুই ভেই এলাক। তারা নাহি খুব একযোদা এলাক তবে গুরো ভেইবো দারানে বর ভেইবো যমর আলচি তবে গুরো ভেইবো যমর ধার্মিক পত্যেকদিন বুদ্ধরে তবনা গরিদো। যে তারা দোলেই দিন হাদেদাক মা বাবরে বরন পুজন গরিদাক। এদিক্কে গরি একদিন তারা দাঙর অলাক । তে বর ভেইবোরে বৌ আনি দিলাক। গুরো ভেইবো আলসি হেনে দাঙর ভেইবো মোগোর হদা দুরি যুদো ওই গেল। যুদো অনেই দাঙর ভেইবো মাজন গরি হার তার হোনো অভাব নেই। যিয়ান মন চাই তে সিয়ান হেই পার ইন্দি গুরো ভেইবোর হি অল হি ন অল হি হার হি নহার হি গরের হি নগরের তার হোনো হবর নেই। গুরো ভেইবো দিন দিন গরিব ওই যার । সম্পত্তি বিজি হাদে হাদে বানা শেষনদি ঘরপাদা জাগা ছাড়া আর হিচ্ছু নেই আর। হিন্তু যে তে তার ধর্ম গরানা নচারে। তার নীতি বজং ওই ন জার। ইক্কু তা বর ভেইওত্তুন ওদর মাগিলেও ন পার আদাম পাড়াল্লেত্তুনও ওদর দার নপার। ইক্কু তে হি গরিবো ভাবিনেই হুল ন পার । হানাদানা ঠিকমুজিম হেই নপার। একদিনে তে এক্কান স্ববন দেলদে আদামর বট গাজর গোড়াত হোনোজনে ন দেগন পারা গরি গেলে এককু সোনার গামালা পেবঅ। তে সে সোনার গামালাবু ঘুরেলে যিয়ান বর মাগে সিয়ান পেবঅ। ঠিক সেদিক্কে গরি গুরো ভেইবো সোনার গামালাবু হোজা যেল। সে সোনার গামালাবু ঘর বিদিরে হোনজনে ন দেগন পারা গরি আনিল। সে সোনার গামালাবু ঘুরে ছেল তে নানাক্কান মাগিল ঠিক তে যিয়ান মাগে সিয়ান সে গামালাবু বিদিরে এজে তে এক্কান মন্ত্র হনেই গামালা ঘুরানা থামাই। এদিক্কেন গরি তিন চের দিন ভিদিরে বর মাজন ওই গেল। ইন্দি তা বর ভেইবো ভাবিনেই হুল ন পার তা গুরো ভেইবো এদক সম্পত্তি হুত্তুন জরেল নাহি হোনো হুত্তুন চুর গরি আনে নাহি। একদিনে হাপ দিল তা গুরো ভেইবো হি গরে হি ন গরে। তে দেলদে ইক্কু সোনার গামালা ঘুরাদে, তে যিয়ান বর মাগে সিয়ান পাই। মনে মনে সে গামালাবু লোভ লাগিল। সিদ্ধান্ত নিলদে যিঙিরি পারে রেত অলে সে গামালাবু চুর গরিবো। ঠিক গুরো ভেইবো হক্কে ঘুম যেব হাব দি তাক্কে তাক্কে গুরো ভেইবো ঘুম গেল। বর ভেইবো সে সুযোগোত গামালাবু চুর গরিল। ইক্কু সে গামালাবুলোই হুদু দেই যেব হাক্কন ভাবিল। ভাবদে ভাবদে সিদ্ধান্ত নিলদে সোজা ছড়া লামন্যে যেবদে। তে ভাত মোজা এক্কু লনেই সোজা ছড়া লামন্যে আদা দরিল। যাদে যাদে যাদে যাদে এক্কান তে নোকা দিগিল। তে নোকা আনত উদিনেই যাদে যাদে ধুজ্জেত পরিলোগোই। যিন্দি রিনি চেধ চাত হোনো হুল নেই। ইন্দি বেল আলে যারলোই পেতও যদবদে পুরের। তে ভাত মোজাবু বের গরিলো। ইক্কু হি তোনদোই হেব? বানা ভাতও হেনে হেব । তোন আনদেও পুরি ফেলিয়েগোই। তে আবাদা গরি মনত উদিল সোনার গামালাবু ঘুরেলে যিয়ান মাগে সিয়ান পাই। তে বাত হেবার আগেন্দি সে গামালাবু ঘুরেল। তে আগে এক্কা হাজা নুন হেবাত্তেই বর মাগিল। গামালাবুট নুন এত্তে এত্তে ভরি গেলগোই হিন্তু তে আর নুন এজানা বন্ধ গুরি ন পারের আর। তে সেই নুন এত্তে এত্তে নোকা ভরিনেই নোকায়ান ডুবি গেলগোই। তে ও পানিন ডুবি মরি গেল হিন্তু যে নুন এজানা ন থামেল। সে নুন এব এব এজের। এ সিত্তেই সাগরর পানিয়ানি নুনজো অয়েদে। নুন বানা সিত্তেই ধুজ্জেত তে পাইদে। সে নুন এজানা এব থুম নঅয় । নুন এব এজের । সে নুন আমি হের।

Share This Post

Post Comment

Please Answer.. * Time limit is exhausted. Please reload CAPTCHA.