হানিবার নচাং আর
সরকাজ্জে’র মিদে হদা’য়,
মিনিষ্টার’র মিজে আজায়
মুই আর ঘরত ফিরিবার নচাং!
মুই শুনিবার নছাং আর,
মানেই ও ওধিকার অ হধা!
বর বর দল বা হন এন জি ও’র-
চিত পরা হেবার হধা!
মুই নছাং আর মরে চেনেই-
আঝার মানযে চিত পরা হাদোক
মেয়ে পরা দেগাদোক!
মুই নচাং আর হব’রত হন ছবি!
হবাল-পরা জুম্ম ,গাল চাবাত আহ’ট,
হানযাবা’ট বে পরের-
পহ্ন চোগোপানি।
ইক্কু মুই চাং,
আজতে’ত ধুরিবার,নুও গুরি লারেই গুরিবার,
বুক পাদি আকশোবার!
এক ফুদো পরান,চাগি চেবার!
লো বদলে লো !
খুন ও বদলে খুন!
ঘর পুরোনার বদলে ঘর পুরিদেনা!
ইক্কু মুই চাং!!
মিলে ঝাবানার বদলে মিলে ঝাবানা,
মরা হিজেক ও বদলে মরা হিজেক!
চোগো পানি বদলে চোগো পানি!
দিবার চাং ভাগ-
আদাং আ উরিবার হন রেত,
মরানা’র লাইসেন্স!!
দর-মর পুজর ফিরোনি-
ঠোগা বাজির রোগোনি আভিলেচ!
ইক্কু মুই চাং,
লো ধোজ্জেত হন রাঙ্গা গোলাপ
পুরি যেয়ে ঘর’র হালা ধুমোত-
হয়েক ফুদ রোগোনি,শিরোপানি!
আঝার তারা’ত বানা এক সুর-
মুই হেনা সুজিবার চাং।।
