**ধারাজ** বরুন বিকাশ চাকমা

Print Friendly, PDF & Email

**ধারাজ** বরুন বিকাশ চাকমা

পরানর আভিলেজে চিদঅ মূরআন আঙি যায়

বেউদো ধারাজসান খরপাগে জট খায়

ভাবি বুঝি ন পারং চিদে চর্যায় লন্দরং

মুই এক বামভুল, রাজভুল কাজভুল

গীদো লামা গেই চাং সুর তুলি সুর আহ্‌রাং

ঘঝা টানি মিলেই যায়, আধ পধে আভর খায়

বেসুঞ্জুগে খুয়োঙ গুজুরে।

নাধা পিত্থিমিত কিত্তেই এলুং

গম এক্কান ন গরিলে?

 

নাধা কাম নাধা মন নাধা বেক চলন ফিরন

নাধা সমার ঘরদুওর, সমাজ দেজ জাদর

যিদু যাং যিদু থাং আগে আগে খুচ পাং

নাধা জনর র শুনং।

আহ্‌ঝিখুঝি কলঅ কলঅ

সিদিরে নিলোজে দাত ভেগাত্ত্যে

কদক্ আর চেয় পেম অহ্‌ল’ বেক পেগাত্যে।

 

গাজ ধরং বাজ ধরং এগামনে সার গরং

নাদান্যে মানেয়রে ফেলেদিম ভং,

বদলেম কু-দিন কু-মনর জিদঘিন

থামে দিম নিলোজ্ আহ্‌ঝি পকতু কেয়ের রেক্কজর পাজি।

 

এমানর হাস্যদে জিদি লয়ে এ সমাজ

নেই কন মানবতা নেই কিজু লাজ।

চেরোপালা ব খেলে ভংভঙ্যা কজরা বাজএ

মানেই সুদোম লুগি যিয়ে আক্কলর রাদ অহ্ইয়ে

ভেজাল ফাগারায় দেজ জাত ডুবি যিয়ে

পুনো বিজ মাদাত উদি ঝালাবুলঅ মাধা লোই

এমানর আক্কলে গজক ওয়ে মানেইয়ে

লালোজর লেত্তোলৈ গদা সরবরঅ।

 

থাদারত মারা পরের সীঝি মনা মা-ঝি

চদরঅ গারি ছারা পাদারত পরি।

কাক্কনর আঝা নেই জীংকানির ঝিগে ফুল

কক্কেনে ঝুরি পরে, পরে উরুত্তুল,

জাদরে জাদে ঘিনেয় বাপ-পুদোর সং নেই

ভংজমা চাগালা ধরি পরাধরা বেক পেই

আল্যম রুঘোরুখ্যা শুগোরর কেবার দাত

সুঘে খেবার নেই মাদান রনদুঘো ভাত।

 

চাং মুই বদলেবার এই কিরিমিরি

ভাবনাত তব গরং জুরোগরি বজি

ও গোজেন! কিত্তেই মর সেদামছারা জনম!

এলুং এই পিত্তিমিত বেআলে বেনালে,

ন পাং কিত্তেই সে সেদাম

জাতকুল গমদালে ধুঅপধে নেযেবার।

মা-বোনঅর ইজ্জোত বাজেদুং সোত সোত

সব্‌পানত অহ্‌দুং মুই কান মানেয়র লুধি

রদ্ নেইয়া মানে’লগর বোই দিদুং ভুদি।

পিরে পস্যা মানসো কায় অহ্‌দুং সীঝি দরব

তিদে করঅ রুস্যালত অদুং মিদে চরব।

নেইয়ে দুখ্যা মানসো মায় ধরিদুং থক

বান্যে জাদর দুখ বিজগত অহ্‌দুং মুক্তির পথ।

Share This Post

Post Comment