“মন-সবনর রেজ্যত”

Print Friendly

ভাবিলে আমক অং,
আমক অবারি হধা!
চের দেবালত বানা থেনেই-
দো মিলি আগাজত উরোনা!
সাধচ্যা রঙর দেবালানিত,
মনর রঙতুলি বাজেনেই-
ফাগুনো আভার জাল বুনোনা।

হয় জনে পারন?মুই অলে পারং!
মুই পারং ওঝার দেবাবোর তারাউনোরে-
মনর আলামত বানি।
চিক চিক্কে হন রেদোত-
গাবুর জুনো পহরান, মুজুঙোত আনি।

ভাবিলে আমক অং,
আমক অবারি হধা!
হুজি হের লগে পুরি থেনেই-
চিলুনো সমারে সিমিনে ছারানা।
ঘোরবো মনানরে ভুলেনেই,
গরবা পেগো লগে-
জার হালত দেবাল্যা লামানা।

হয় জনে পারন?মুই অলে পারং!
মুই পারং মেঘ পুদিরে মুজুঙোত আনি-
ম মন হধা হোই!
আহ্জার বজর দুরি আমক ওই থে পারং-
ইক্কো পহন শিরো পানি ফুদোলোই!
মুই দোগিনোর বোয়েরত-
মেয়েবি সুর তুলি পারং।
ভাজা ভাজা সবনানি দেবরঙে সাজেনেই-
দেবোংসি গোলাপ মুই ফুদে পারং।
শুনিচ নোনাবি,তরে চুবে চুবে হং
মর মন-সবনর রেজ্যত-
তরে, জানাঙর নিমন্ত্রন।

Share This Post

Post Comment

Please Answer.. * Time limit is exhausted. Please reload CAPTCHA.