”দুজ হেনেই উজ বুজানা”।। দীপক চাক্‌মা

Print Friendly, PDF & Email

ন বুঝিনেই লাঙ গুচ্চং
হিয়োং ইক্কো দুজ
রেদে দিনে ঘুম ন অনেই
বুজচে এবার উজ।
এদক গুরি মানা গুজচোন
ন মানিলুং হারোর হদা
লাঙর মাত্তল ধরিনেই মর
হারাপ উয়ে মাদা।
নুদি নুদি হোদা হদে
পিয়োং তারে লাগল
মিদে মিদে আজি আজি
গুজচে মরে পাগল।
সময়আনি নষ্ট গুচ্চং
আরে গুচ্চং টেঙা
গমত্তেই বুঝেলে মরে
শুননং মুই বেঙা।
মান্যেরে চুর গরিনেই
গত্তুং তারলোই দেগা
তারে তেদুং ভাবি ভাবি
ন গরিদুং পড়া লেগা।
ঘন্টা তিয়ে হোদা হনেই
ন অয় হোদা থুম
রেত জাগিনেই তাক্কে তাক্কে
ন অয় মর ঘুম।
হি গরলুং জীংহানিয়ান
ভাবি ভাবি থানা
হবাল বাজচে থেই থেই
দিনে রেদে পস্তানা।
এ জীংহানিত দাঙর ইক্কো
হেলুং মুই দুজ
ন গরিম আর লাঙ হারোর লগে
বুজচে এবার উজ।

Share This Post

Post Comment