হাম্মো / হাম মো ।। বাসু দেব চাক্‌মা

Print Friendly

বেল সদক সিদিলো ।
আন্ধার সিরি মৌনো মাদাত ,
বেগ তলে সং জাগাত ।
ঝুবুরো সেরে পেগে হলাক ,
নো দিনোত নথেম আর পাদা তলাত ।

ইক্কু আমি হামত লামিবোং ।

পইল্লে সদক হিয়েত পুরিলো ।
বুড়ো পাদা ঝুড়ি গেল ,
হুজি পাদানি বেগরে হল
ফোগোদাং অল মর দিন ,
পিত্থিমি রঙ বোদোলে দিম ।

ইক্কু আমি হামত লামিবোং ।

রোদোর ত ফুদিলো ।
সুরুঙো ভিদিরে আন্ধার মাদিত ,
পুক জুগোর দেজসানিত ।
তারা হলাক, বেগে জুগোল অ ,
মাদি হুরি নো দেজ বানে ল ।

ইক্কু আমি হামত লামিবোং ।

বেল পহর ফুদিলো ।
গাবুরে রেং দিলাক ,
নো দিন এজচে,বেগরে হলাক ।
জাগি উদিলাক বেক্কুনে ,
গাবুরে হলাক মুঠ ভিরিনে –

ইক্কু আমি হামত লামিবোং ।

পিত্থিমি রঙ সিদিলো ।
নানা ধগে নানা রঙে ,
ভুরি উদিলো আর গমে ।
হাম্ মো উনে জয় ধুনিলাক ,
পরান বোলায় বেগে হলাক –

ইক্কু আমি হামত লামিবোং ।

Share This Post

Post Comment

Please Answer.. * Time limit is exhausted. Please reload CAPTCHA.