ভাবং মুই জাদত্তেই। দীপক চাক্‌মা

Print Friendly, PDF & Email

দিবুজ্যে পাগানা রোদত

গাজত তলে বুজিনেই

চোগর পানি পড়লগি

জাদর হোদা ভাবিনেই।

ডেনে বামে রিনি চেলুং

হারোরে দ ন দেলুং,

হি গরিলে হি অব

ভাবিনেই হুল ন পেলুং।

দোল এল আমা জাদর

গিদিয়ুনোর মনানি

মুরদ পুরি ভাবি চাঙর

এজের আরও হানানি।

মিয়ে দিয়ে এল তারার

এল বিশ্বেজ যা জি

সে দিন নেই আর ইক্কু

বেক উয়োন সদান পাজি।

হারে হোন্না তগেই পারে

হোন্না বেজ দেগে পারে সেদাম

লাড়ে বাঝেই মুজ্জ যেনেই

নিগিলে হিয়ের গাম।

মনান উয়ে দান দারাঙ্গে

বুককো যার শুগেই

হুলুক অয়য়ে আক্কল বুদ্ধি

ন পারির আর পহনেই।

বুলি মাদি নাধা অর

মানেই হুল বাড়দন

হুলি যুগ ন এত্তে

মিয়ে দিয়ে আরাদন।

গাছ বাঁশ হুমি যাদন

ন পায় দারু তোগেলে

অসুখ বিসুখ বাড়ের মানেয়র

মরি যাদন অকালে।

সত্যযুগত্তুন ধুরি হুলিযুগ

এমানে মাদি যাদন নিজর বাজে

ন লড়ে বাজ এব তারার

আগে আগর ধগে।

মানে বাজ বদলি যার

অই যার মিজেল্লে

নিজর বাজ লুগেই যার

মুজনো অর হুরোল্লে।

ভাবিনেই হুল ন পাঙর মুই

তুমি এক্কা ভাবি স

সময় থাক্কে জাদত্তেই

দোল হাম গরি য ।

Share This Post

Post Comment