আল্যেক

Print Friendly

মুই এক্কো কজমা ফুলো করি
ফুদিবার চাঙ এইল তারুমোর গাজে গাজে।
মুই এক্কো গেইয়ে কোগীল
ঘঝা দিবার চাঙ এইল মোনর আহ্ভা লঘে।
মুই এক্কান চিগোন পাদা জুরি
এগামনে মিঝিদুং চাঙ খেলাং দয্যা সমারে।
রিজেঙর মুই জুরো তামজাং
কাম্মোগঙার মর ভেদের আঘে।
জুমো কলগত মুই সাঝন্যে জুনি
জলিদুং চাঙ মেলাহ্ খুঝিয়ে।
মুই ফাগুনর ঝল্ঘা বোয়ের
বেই যেবার চাঙ লাঙেল দিঘলী।

মর ধাপ আঘে, ধারোজ আঘে
আঝা আঘে সবন আঘে,
মুই অহ্‌বার চাঙ ডাঙর দীঘোল
কাবিল কদগী কামে কজ্জে
সিক্খেই আল্যেগে রিদিসুধোমে,
চাঘি চেদুং চাঙ সংসারর নুন-আনুনি
অহ্দুং চাঙ পাংঘা বাগস্যে।

তুমি কি দিবা মরে সে সুযুক?
আধ্দানত আগা কাবি ন মুচ্চেবা মরে,
কুঝি কেয়েত নক ন ফুদেই
আক রাঘেবা মরে।

তুমি কি দিবা মরে সে সুধোম?
সাংসাঙ্যে মনত কাজর ন এদ’
রুঘোরুক্যে অজবা মুহ্ওত ন বজিদ’,
সমাজ্যের কোচপানা পুনোত ন পুযিদুং
পারাল্যে মানুচ্চুন সুত্তুর নভাবিদুং।

তুমি কি দিবা মরে সে সিক্খে?
জাদর পয়দেনে পরান ফেলেদুং
নিজো আলু খুরি ফাঘারা ন অহ্দুং,
বিজগত লিবি থেদ’ মর নাঙ
অজল বার্বো সেদাম।
সীঝি মনে যারা মরে ঈদোত তুলিবাক
সোনার অহ্রগে মর নাঙ লেঘি রাঘেবাক।

তুমি কি সিঘেবা মরে সে কাম?
লহ্ক ধরিবাক মরে আহ্জার জনে
লেবেদে থবাক চিতরিবেঙত,
ভালক যেরেও ওহ্‌ম মুই তারার আল্যেক
যারা এবাক আহ্জার বঝর যেরে।।
—০০০—
আল্যেক=ideal
ডালি দেনাহ্ : ভেই মারনি লারেয়ত যারা মুকপাত্তি ওহ্ই কাবিদেঙি গত্তন তারার উদিজে এ কবিতেবো ডালি দিলুং।

Share This Post

Post Comment

Please Answer.. * Time limit is exhausted. Please reload CAPTCHA.