।।তুই আর পিঠ নলামিজ।। বাসু দেব চাক্‌মা

Print Friendly

আন্ধার পিত্থিমিত থাজ তুই,
বেল পহর দেলে দোরাজ !
চোক্কুন তর নাদেই রাগাজ,
লুগি লুগি থাজ ।

হয় দিন আর থেবে তুই
ঘর অ হনাত পুরি ,
হিয়েনত তর সাং পজ্জে
যেয়ে উল পুড়ি ।

পিত্থিমিয়ান ভোজান দোল
এক্কে না রিনি চা ,
হুয়েনরে জিংহানী হন
দোলে তোগেয় চা ।

পিত্থিমি ওয়ে আলাম অ ধক ,
বেক্কানি তুই পেবে
গম বজং ছাগিনেই তুই
গমান তোগেই লবে ।

ফুজ্তে ফুলুন যেক্কে গুরি
পুরোন ওনেই ঝুরি যান,
সেদক্কে গুরি মানেই উনে
বুড়ো ওনেই মুরি যান ।

রানজুনিত পেবে সাত্তান রং
মানেই জিংহানিত আর বেজ !
সে রঙানি ফুদে তুলনা
হামানত এক্কা দুগ বেজ ।

রঙে রঙে ন মিলিলে
সিদিরে-ভোদোরা অয় ,
জিংহানিয়ান সাজে নজানিলে
দুক্কান ও বেজ অয় ।

মরন অ রে নদরান যারা
বুক পাদিনেই থান ,
পাত্থর অ ধক দর অনেই
মুরিলে ও বাজি থান ।

মরন অ রে দোরেই যারা
ঘর অ হনাত থান ,
পরানান অ লগে তারা
পিত্থিমিত্তুন আজি যান ।

মুজুঙেন দি উজে যাদে
নিবিলি পথ পেলে ,
ডোরেনেই আর পিঠ নলামিজ
গম জিংহানি চেলে ।।

Share This Post

One Response to "।।তুই আর পিঠ নলামিজ।। বাসু দেব চাক্‌মা"

Post Comment

Please Answer.. * Time limit is exhausted. Please reload CAPTCHA.