রজবন্দ ।। দীপক চাক্‌মা

Print Friendly, PDF & Email

রুঙ্গ্যা খুড়োল মারিলুং ত হিয়েত
তুই মারিলে মরে বাদলর গুলি
দু জনর রদ বল আগে বিলিনি
চিগন এক্কান ভুলে
ন হিমির হিয়ে জনে।
আলঝ্যা ধক গরিনেই আগে ধুমে ধুমে
আমা দি জনর হুজচে।
অগমান হোন্না গুজ্জে আগে
তুই না মুই আমা জাত্তরে?
অজবা ভাজ মাদির হদক
মুওত্তুন জিংহানিত ন নিগিল্লে হোদালোই
গেইল দেদন আমারে।
শুনিলিও ন শুন্যে ধক গরি
বোরা বান্যে আমা হানানি
দি ছোখত বান্যোন মালা
আদদুবো অনেই মাদা ভাঙি যের
আদং উয়ে আমা মনানি
ইনজেব আনি বান্যে গিরেং।
আলেই লাঙ্খ্যা গরি লাড়ে বাজের
ভেইয়ে ভেইয়ে ন আদির আমি।
উগুধা ঝাবাদা হদা হোই হি গরির
যা হেজচান তে রজেবার চের
ইন্দি জাত উবোত পুন্দরী ওই যার
আমা তামাজা চাদে।
ওল বুদিনেই তগাদন ওজলেঙর হোনা
তিবুরুক তিবুরুক উগুরি উদোদন
আদিক্যে এঙেলা হুগরর র শুনি।
করম পুগর দগ গরিনেই
নিত্য হের জাদর লো চুজি
তুচ্ছে লাগের নিত্য
অজাত্যে মানজো ধক গরিনেই।
হলেই বেগে কাবিদাং
দক দেগেই কেপদারর বলে
যা আত্তান আগে আক্কুলায়
পেদেম গরি মারিনেই চবাচালত পাদে দির
আধালাং ফাদালাং গরি বাজের হজচে
দির মানজোরে অফুরন্দি দুগ।
খরল্লুয়া ওই যের জাদত্তুন
হমলে হা পরে হিজেনি চিদেরে তানান
আহদে টেঙে বানি গঙাত দিবাক
চিলাং তিক তিক রেঙ হারি বাক
সেক্কে হাম ন অব রাজ মন্তর দিলেও
যেদক আগে সেদাম বল।
এব সময় আগে ভেই
জুল থাক্কে গাদি লোয়
আয় যাদি দি জনে
একযোদা ওই।
মেরে পুজজে জাততোরে তগ দিই
থিলি নেজেই মজুঙে
টুলি আনিই মোগগোল পুজজে, আনাল,
বেলোক উয়ে বাপ-ভেই, মা-বোনরে
বুরুজ উদিবার আগেনদি
যেদোক উরুং আগে মনত
বেককানি পুরি ফেলেনেই
গোঙার নালোত ভাজে দিনেই,
মোনানিরে দোল বানে
নোনয়ে চিলোর পানি ডগে
আদে আদ ধোরিনেই।

Share This Post

Post Comment