রাঙামাত্যা।। বাসু দেব চাক্‌মা

Print Friendly

মিদে হুজি রোদ
রাঙা বেল আগাজত ,
ঝারবো ফুলোর তুমবাজ সিদের
দগিনো বোয়ের অ নালত ।
ভারি দোল লাগে তারে
চেলে উদি পজতে ,
সর্গত্তুন বেজ দোল
ম পরানর রাঙামাত্যা ।
ঘুম ভাঙে পেগো গীদে
হুজি লাগে মনত ,
সোনার বেলান রঙ সিদে
পিত্থিমি আজে পহর অত ।
বারিজে দেবা ডুগুরিলে
মৌনোত উদে রানজুনি ,
ঝুরগো মনান পতপজতে অয়
ভুমিত পুরিলে আগাজ পানি ।
বুক অজল মৌন মুড়ো
গাঙ বেনেই লামে পানি ,
শিঙোর অনেই টজ রাগায়
বাজায় বেগ জীংহানি !
ঝিমিত ঝিমিত জুনি জলন
পেক ডগরন জুন পজ্যে ,
রেদোত অয় সর্গপুরি
সর্গ রেজ্য রাঙামাত্যা ।

Share This Post

Post Comment

Please Answer.. * Time limit is exhausted. Please reload CAPTCHA.