চাক্‌মা কবিতা “মা” লেখকঃ- বরুন বিকাশ চাকমা

Print Friendly

“মা”

বরুন বিকাশ চাকমা

 

থুম নেইয়্যি গুনে গুনী

দোয়েলি মা-দো!

তর নফুরেইয়ি মেয়ে দয়ে লোই,

বাজি আগঙ সংসারত

এ জিংহানী লোই।

দজ্ মাজ দজ্ দিন

রাগেয়োচ রেদ দিন

নরম পেদ ভিদিরে

দুগে হস্তে হদক মা-দো

মরে জনম দিলে।

 

তর বুগোর দুধত্যি মধু

মুঅত মিদে আহ্জি,

পেই হেই মুই মা-দো

দোলে আগঙ বাজি;

হদক আদর ভরা

হিরবে দয়ে মেয়েই,

থুম নেইয়্যি মৈত্রী করুনা

আ মুদিতেই।

রাগেয়োচ্ মরে যত্তনে

তর নরম হরত;

নদিলে এক্কায়ু

পেবার দুগ্ দরদ।

 

হাম ছাড়া দিন

আ ঘুম ছাড়া রেদ,

হাদেয়ুচ্ মত্তেই বিলি

ওইনে…এক হেত!

চোগোত ঘুম পেদত ভাদ

উদোত ঠুদোত পানি,

বেগ হিজু ত্যাগ গরিনেই

মরে আনিলে পালেই।

 

মত্তেই বিলি অহাল্যি

হদক হস্ত পেয়োচ্,

সুজিবার সে ঋনুন

নেই মর সাহজ;

মা-দো! তুই পরানর হোনি

মর দ্বিচোগোর মানেক,

তর মেয়ে দোয়ের পহরত

পিত্তিমিয়ান দেগঙর হালিক।

শ্রদ্ধা ভরি চিত্তেই

মা! গরঙর সালাম,

আশিদবাদে যেনে মুই

সুগে জনম হাদাং।

 

তর শিক্ষেই তর আল্যেঙে

পেয়োঙ সিয়ত সুদোম,গুন

মান আ দোল জ্ঞ্যানান,

সিত্তেই মা সংসারত তুই ডাঙর

তর জাগা পরে আগে বুদ্ধ ত্রিরত্নর।

 

মা-দো! তর হিরবে মেয়্যেলোই

সুঘোর ওক এ জিংহানিয়ান

পদ্ধ ছাবা লোই;

অফুরন্দি সালাম জানাঙ

তর ঠ্যাঙত তলে,

এ সংসারত বেগত্তুন বেশ তুই সদর অলে;

হেইয়্যি ছাবা হেইয়্যি সমার

যেন নিত্তো আগে

তর আশিদবাদ ও থোক

মর লগে লগে।

 

লেখাটি Research Our Culture, Tradition and Script ফেসবক গ্রুপে প্রকাশ করা হয়েছে।

https://www.facebook.com/groups/hillbd/doc/300987813245953/

Share This Post

2 Responses to "চাক্‌মা কবিতা “মা” লেখকঃ- বরুন বিকাশ চাকমা"

Post Comment

Please Answer.. * Time limit is exhausted. Please reload CAPTCHA.