**ছরান ** বরুন বিকাশ চাকমা

Print Friendly

**ছরান ** বরুন বিকাশ চাকমা

 

পেজেরা পধত লাঙেল দীঘলি

আঃঢঙর এগাঝারা,

ডেনে বাঙে রুঅ ভূই কুজুরুক ছলা জাবুর;

সাঙেত সমার চেরেই পুক

দাংদাঙ্যে বৈজেক্যে পাগানা রোদ।

ঊদিস কারে?

 

 

পত্যে সবনর তজিম ধারাজে-

 

এগামার মুই গজাঙে প ফেলেই

যাঙর মোন মুরো করত দি।

তারেং রিজেং ধুধুক বিজোল ফারি

হনিজেস্সে পাদারা এরি

একবুক সাঅজ লোনে,

কালাঝার কালাবাঘর মুঝুং ছেরে ছেরে;

লাড়েয়র যুক্কলত ওই দর’মর’

নখ ধারেই লেঙুর মজরি

রম’সম’ কিজেক সারি-

পোগোন গুলো মর ঝাগেরেই উদে

কেয উভো বনা বনা জার’ কাদা,

তুও মুই বুক দর’-

জিংকানির মেয়ে ছিনি কেপদারি ভরযা লৈ

লুম্ব গুজুরেই এক লামার আরগানি।

কুইয়েং সমার তাগী,

গুজুরে কুওং

আগাজত দেবাপেরাক বোয়েরর সজানি লগে

মিঝেল অই মর পেদাসারা রন’ কিজেক-

কু উ উ উ উ উ উ উ উ উ,

 

এয অ অ অ অ অ অ ও ও,

 

উজ অ অ অ অ অ অ অ অ।

 

পৈনালি সমার এজন ঝাক বদি

 

এজালে সরিদ ওই জোধা বাণাত তলে।

 

তেম্মাঙে লাক্সা বদি লর্বুঅ সাজি

 

পরানর মেয়ে সুদো সাত নাল কাবি,

 

জিংহানি আমার নয় এগেমে সার গরি।

 

রাইফেল কানাত লৈ বারোজর উমেয়ে বাচ,

 

আল্যেঙে সদর ভাবি

শেয লামার ধারাজে..

পাল টিগে ঝারবো ডেইন

ঢালা পোরেই সমি আমা চাগালাত,

শুজি খেবার চা’ন আমা লো সট্যে এরাচাজ!

বানেদাক ডেইন পাড়া আমার এই মানেই পুরী,

কারি লৈ গদা সজপদর-

পাদারত চদর’ বানেই।

আমি কি সেই তুচ্চ্যে সো’ই পারি?

কন আল্যেগে আমনরে আধার কোলেই পারি?

এই জিংকানি বানা আল্লো নয়,

 

ধারোজ বিলি এক্কান আঃগে

 

তজিমপুরো ভরনভিরন-

 

মানেয়র সুদোম, জাগা

দোলে বাজি থেবার;

 

ছড়ান পেয়ে বলপেয়ে মন

অবাঙে চলন ফিরন।

 

খেলাঙে মুক্ত জীবন

কার’ অধিনত নয়,

গোলামর সাদাঙা আঃঝি

সিয়ানদৈ খুজি নয়;

মর মনজুক অবাং সাধীনতা

কধায় কামে চলন ফিরনে,

 

পেঞ্জুরো ছাস্যে সোনাত্তালি।

 

মন খেলাঙে চরি বেরেম

এদে আগেরে গদা চাগালা,

 

ইয়ান মর আরাং ধারোজ

ইয়ানই সাধীনতা,

 

লারেয়র এই ফল,

বান্যে জিংহানির দুঘর ধুঝি।

 

ইয়ানই ছরান পানা।।

Share This Post

Post Comment

Please Answer.. * Time limit is exhausted. Please reload CAPTCHA.