ফাগোন এলে

Print Friendly

ফাগোনত আরগানি অহ্‌য়

ভঙরার গুজুরনি,

ঝাক বদি মুপুগর মধু থুবনি।

গাজে গাজে হুজি পাদা হরত উদি যায়,

চেরো পালা এইল চাগ চাহ্‌দে চোঘ জুরায়;

জাগি উদে পিত্থিমী গাবুরর ঢঙে

সিনেলির লালোচ মনে সাজে নানা রঙে।

 

লুদুপুদু মজি থায় মেয়ে আল্যেঙত

ফুলপরি বৌ সাজে ফুল বিচ্ছনত,

চোনা চোনা তুম্বাজে মাত্তল বেউজ গরি

লামি এই মেদিনিত বানেলে সর্গপুরী।

 

চিত মেলা আওজে বুনি হির্বে জাল,

নোনেয়ে আহ্‌ঝিলৈ গরিলে বেআল।

লাঙ’ মন ছতপত উজুলাই অনসুর

আয়পায় নিলোজ গঙেই যেদ চায় ভালুদ্দুর।

ফুল ঝরত ভিজিনেই ঈল মনে গাদিবার

সবনর মেয়ে হলাত জনমান ফেলেবার।

 

ফাগোনর হি জাদু ফুলে পাগোরে

মধু সরভ এগাদারু গুণেমন্দরে,

পেগো গীদ’ মিদে সুর বোয়েরত রুচ্যেল

তিনেঙর সুঞ্জুগোত দর’মর’ পুচ্যেল।

উরম্ভায় তিনেংফালাং লুজুরুক এ মনান

বনা বনা সবন দেঘে এগাঝারা জিবনান।

 

চোঘ ফেহ্‌ লেহ্‌ ভাবি ভাবি যায় হুদু মিঝি

সুঘো রেজ্যর ফুলবাগানত আঘে তে বজি,

রেজ্যমায় মানে’লগর বেগর এক পরান

মেয়ে দোয়ে হোচপানালৈ ভরন তারা মনান।

সাংসাঙ্যে হেলাং মনত তুদো হিচ্ছু নেই

বেগে মিলি একভাব আমি আরাং মানেই,

আল্যেং হির্বে মেইয়ে মানেয়র সুদোম

জগদর পরাণবলা আমি বেগ’ উত্তোম।

নেই হন’ রিযারিযি ঈংজে পিজুম

সংসার’ গম ভালেদি ইয়ান আমার গুণ।

 

ফাগোন এলে এগামনে হদক ভাবনা উদে পরে

ওল গরি দলামজা গরং মনানরে,

জুরো গরি হি ভাবং হি সবন দেঘং

আবাদা গরি চেদন ফিরি মু চিমে চিমে আহ্‌ঝং।

ফাগোন তর গুণমন্দর টুর ভজমান

তর ডগ-এ বেঊজ অহ্‌য় মর এ মনান,

চাহ্‌দে চাহ্‌দে রঙানি বদলের ফাগোনর

চেদনর আহ্‌ভিলেজত মুই এভ’ ঝুরঙর।

Share This Post

Post Comment

Please Answer.. * Time limit is exhausted. Please reload CAPTCHA.