||এক্কান সোনার দেজ ||

Print Friendly

হুঝি মনে, রঙে-ধঙে এগা মনে,
আহ্ঝিবাক-নাজিবাক পাজীবাক!
মিগুলো দেবা তলে এহেল ধান গাজ লগে
ঝোল গা বোয়েরত মিজি যেবাক,
নিজোর উরোন-পিনোনে বেরেবাক বুক ফুলেনেই,
পোর্বুয়া অবাক নিজো মা ভাচ্চোই লেগা সিগিনেই!
এক্কান দেজ! নিজো নাঙর!নিজো জাদর!
ধারোজ গরে বারি,সেনে সবনে দেগং!
এক দিন আমি পেবং গে পেবং ,
এক্কান সোনার দেজ!

নারেং পুত্তিক ও ধক তুত্তুরেবাক,
গুরোউনে হারা হোবাক,আমক ওই চেবাক
উগুরে অঝার কার্মা(blue) তলে হুঝি এহেল!
ফুদিবাক ফুল,সিদিবো রং রানজুনি সাত রং!
তানজাঙর পানি পহন,মানেয়োর মন হুঝিয়ে ভরন।
নিজো-সুদোম নিজো-রিদিয়ে সাজিবো সমাজ
ফুলো তুম্বাজ নানা রঙে সাজি থেব উদোন,অজল অজল মৌন।
সদর মেয়ে টান,বেন্নে-পোত্যা পেগো গান,
আওজজর এক্কান দেজ! নিজো নাঙর!নিজো জাদর!
ধারোজ গরে বারি,সেনে সবনে দেগং!
একদিন আমি পেবং গে পেবং,
এক্কান সোনার দেজ!

অজল মৌনো সেরে বাজি সুর,চিৎভিচ্চে এহেল
জুমো পিদিত নাঙেল,সিগোন-ডাঙর গাঙ
পাড়ত খন্জন-অ মোজান,ভোরোন্দি আদামত
জুন পহরত পজ্জনর সুর,ঘরত আজু-নানু হরত
আদে মোজানে জেদা ওই এজন মুজুঙোত-
লোরবো-বলী,লাংঙে-লাঙোনি বা দোল হন পরী!
গম লাগে বারি শুনি,বোয়েরানে হদা হয়।
সবনর এক্কান দেজ! নিজো নাঙর!নিজো জাদর!
ধারোজ গরে বারি,সেনে সবনে দেগং!
একদিন আমি পেবং গে পেবং,
এক্কান সোনার দেজ!

Share This Post

Post Comment

Please Answer.. * Time limit is exhausted. Please reload CAPTCHA.