বুগর বল,মনর আজা লনেই
এজ আমি লড়েই
রক্ত যোক, জীবন যোক,
সিয়ানি আমি ন দোরেই।
আত্তের আদত,হমরত গুলি
চোরেবং এবার,
উজেবং বল গুরিনেই
ন চেবং পিচ্ছে দেবার।
এ লড়ানা শেষ লড়ানা
অধিকার পেবাত্তেই
নিজ স্বার্থ ন চেনেই
চেবং জাদত্তেই।
চিল চাদারা রিজেং হামা
সিয়ানি আমি পার অবং
দুজ্যে, মোন হত্তা দিনেই
আমি লড়েবং।
ন রাগেবং হোনো শত্রু
আমা এ জাগাত
ন রাগেবং হোনো স্পাই
চোর আর ডাকাত।
মনানরে হাজেই য়ারাই
পুতপুত্তে বানেবং
রাগ হিংসে বাদ দিনেই
আমি লড়েবং।
এজ আমি বেগে মিলি
ওই একযোদা
আদাআত্তে ধরাধজ্যে গরিনেই
শাসন গরিই পিত্তিমিয়ান গোদা।
আমা অধিনত রাগেবং
পরিয়ে জাদরে
জুম্ম জাত হিনদিক্ষে
বুজেই দিবং তারারে।
পিত্তিমিত যেদক বাধা
আমি পার অবং
যেদক দাঙর শত্রু ওক
আমি লড়েবং।
এ দেশত এ জাগাত
ন রাগেবং তারারে
যারা নিত্য হিংসে গরি
লালি মাজ্যন আমারে।
এজ আমি বেগে মিলি
অধিকার তোগেই
জাত্তো হদা ভাবিনেই
শত্রুরে লড়েই।
