নোনাবি,ঝরত ভিজিবি?
ঝুবুরো সেরে হজমা মনা উনো ধক!
ভুলোং উনো ধক,
ন অলে লগত ফুত্যা হন ফুলো ধক!
মেগ চাগা উনো ধক!
আয় ঝরত ভিজিয়োই।
ঝরত ভিজি ঝুরো-পুরো অবে,
লাজুরি ফুলুনো ধক!
ইক্কু যুদি হন পত্তাপুত্তিক এজন-
হিয়েত বাজি ফুলো উগুরে বজন!
হেন জান লাগিবো হবর পাজ?
বারিজে অক্ত ত মুরো-দেজত,
মেগ অ সেরে রান জুনি ধক!
আয় ঝরত ভিজিয়োই।
জার গুরিবো বিলি নভাবিচ,
আজা গুরিনেই উমোত রাগেম!
সেবা হাজে দুরিবো বিলি চিদে নগুরিস
উম উম আদা চা বানে হাবেম!
বেজ যুদি হাজে’ই ধরে,
চা ত দি দিলুং হয়েক ফুদো হামোজি রজ্!
তুম্বাজত্তে এক্কান-দিয়ান হামোজি পাদা!
নোনাবি! ঝরত ভিজিবি?
ধান ছোরাউনো লগে নাজিবি?
গাচ্চুনো ধক গুরি আর নথেজ,
গাঙ অ পানি ধক এ অক্ত গেলে আর নপেবে!
এ জুরো বোয়েরান,পহন পানি ফুদউন ও হি পেবে?
আহ্ত্তান বাবেই দিলুং!
আয় ঝরত ভিজিয়োই।
