“হাল পালনী”
আর হদক গরিবং হাম
এজ আমি জিরেই,
যেদক হাম গত্তং সাদ
যে দ জিরেন নেই।
এজ আমি বেগে মিলি
দোলেই ভাবি চেই
হেনে আমি সুগ পেবং
সেই পদতান তোগেই।
এই বাবত্তে গরি আমা গিদিয়ুন
নানাক্কান ভাবিলাক
হি গরলে হি অব
ভাবি হুল ন পেলাক।
বেগে মিলি তেম্মাং গুরি
রাজা সিদু গেলাক,
রাজা সিদু যেনেই তারা
দুগর হোদা হলাক।
রাজাবাবু মাদা লারে
দোলেই ভাবি চে’ল,
হক্কে জিরেলে গম অয় তোমার
প্রজাউনোরে হল।
বেগে মিলি তারা আ’র
দোলেই দালেন ভাবিলাক,
আষাঢ় মাজর সাত তারিখ
তোগেই সোত পেলাক।
সেই দিননো এলে তারা
বেগে জিরেবাক
হাম হরজ বাদ দিনেই
রেঙে গিদে থেবাক।
সেই দিননো অল তারার
বজরর জিরোনী
নাম দিলাক সেই দিননোরে
‘হাল পালনী’।
রাজা আদেশ পেনেই তারা
গোদা রাজ্যত দুল মারিলাক,
সিত্তুন ধরি চাকমাউনে
হাল পালনী পালেলাক।
