বেক্কুনে আমি জুম্ম হোলেই,
বেক্কুন আমি ভেই ভেই,
অলর গুরি তেই ন’জানিই,
নিত্য আমি হোল বাজেই।
ইজচে মারিই একজনরে,
হিললে মারিই দুজনরে,
মারতে মারতে মাত্তল উয়েই,
গম ন’লাগে মারি ন’পেলে।
হারোর হধা ন’শুনিই আমি,
হোলেই ভেগর রাজা,
তেই ন’পারিই হেই’ন ফেলে,
মদ, বিড়ি, গাঁজা।
নি’জ ভেইয়েরে মারি পারিই,
পরিয়েরে দরেই,
এদুক্কেন গরতে গরতে,
গোদা বেক্কানি আরেই।
ও ভেইলগ,
তুমি শুনর নি ন শুনর?
আমা জাত্তো হি হি আরের,
গুনর না ন গুনর?
ইজচে আরের রিদিসুদুম,
হিল্লে আরের ভাজ,
মান সম্মান আজি যারলোই,
আজি যারলোই লাজ।
ভেইয়ে ভেইয়ে হোল বাজে তেই,
হো ন হিত্তে হবর নেই,
দি সেরেনদি মা বোনুনে,
বেজা’দ লগে জাদোন্দোই ধেই।
আগ দিনর পোঅ চাবাগুন,
মানুষ দেলে লাজেদাক,
বুড়োবুড়ি লাগাত ফেলে,
টেঙত ধুরি সালাম গরিদাক।
আগ দিন মানুষ্যুনোর,
এল মানসম্মান,
আজি যার, লুগেই যার,
আমা জাদর নানাক্কান।
বুড়োবুড়ি তেলে তারার,
তা হদানি মানিদাক,
হি গরলে হি অব
নানান বুদ্ধি লধাক।
প্রসাল্ল ধুজ্যে ভেইলক,
আমা জাত্তোরে,
ন থেবং আর এই পিত্তিমিত,
লুগেই যেবং এক্কুয়ারে।
