মনান গম নেই হিনেই তর
মন দুগে দেবাবু হানের,
বোয়েরানো তাল আরেয়ে
ঝরা পাদা ঘর ভাঙের।
গুজুরি হানের মেঘ পুদিয়ো
লুগি যেয়ে জুনো পহরান ও
চোগোপানি ফেলার তত্তে
নাল মরা চিগোন তানজাং আনো।
মনান গম নেই হিনেই তর
মু হালা ঘরর চুলোবু,
রেদোর তারা আঝি যেয়োন
নফুদে ফুলো হুরিবু।
রেত নজাগে আলসে পেজা
ন জ্বলন রেদো জুনিউন ও
অলর গুরি আগন তত্তে
নগাদন গীত ঝুবুরো সেরে পেক্কুনো।
মনান গম নেই হিনেই তর
রঙ ন ছিদে সাজন্নে পহরান,
মন আগাজত হালা মেঘ
গম নলাগে নুদি ঝড়ান।
রঙ ন ছিদে পজিমো বেলর
ন উদে সেনে রানজুনি ও
নোনাবি তর ব নিজেজে
গম নেই আর ম মনান ও।
বজর ফিরিলে ফাগোন ফিরিবু
ও নোনাবি-
ফিরে আন না তর আঝিবু
দুলু বাজর বাজি বাজিবু।
নিত্তুঙে সাজিবু তর সবনান
নুও আঝালোই বুগোত বান
ঝারবো ফুলোর তুম্বাজ সান
ও নোনাবি-
তোলবোল্য়া তত্তে মন-পরানান
দুগোত নথোজ আর ত মনান
নানা রঙে সাজে দিম তত্তে
উদোন দি বেলর রাঙা পহরান।
14/8/2014
