দেবাবু তর মন বজং
হন্না জানি ত হায় নেই!
মেঘ পুদিয়ো মু হালা
হার মুওত হধা নেই!
– এ বারিজেত।
সোজ রঙান তর আঝি গেল
হালা হালা মেঘ সেরে
ও দেবাবু দাগি চেলে তুই দেবে
মেঘ পুদিরে হায় পেবে
-হোচ পানার হধা হলে।
দেবাবু তর চিক চিক্কে?
হন্না জানি ত হায় নেই!
মেঘ পুদিয়ো উব আরা
হার মুওত আঝি নেই
-এ বারিজেত।
দুগে দুগে দেজ ছাড়ি যার
চোগো পানি পথ ভিজে যার,
ধাগি যার বেক মৌনে মৌনে
লামি যার তে হানি হানি
-বুক ভরন মন দুগে।
দেবাবু তুই গুরুং গুরুং ন দাগিচ,
দেবা চিমিত বুক চিরিনেই মন নভাঙিচ!
মিদে মিদে বোয়ের নালত দাগি চা
রান জুনি তুই বুগোত গুরি আঝি চা
– মেঘ পুদিরে তুই পেবে।
আজিন-হাদি মাজ এলে
দেগি তরে ধুপ রঙানি নুদি নুদি অব চি!
দোগিনোর বোয়েরত তুই দেবে-
মেঘ পুদি ফিরবো-
দাগি চেলে তারে পেবে।
24/5/2014
