যে গাজর হন সিংওর নেই
সে গাজ অল পরসাল,
যে জাদর হন বিজক নেই
সে জাত অল পরত্তুল্ল জাত।
যে গাজর সিংওর মুরোত
দর-মর গুরি বাজি থায় মাদিত,
সে গাজ অয় অজল দাঙঅর
বাজে ভালুক দিন এ পিত্তিমিত।
সেনান্নে গুরি যে যায় মুরোত
জাদর বিজগর ভালুদ্দুরোত
হোচপানা,মেয়ে,টান জাদর-
ফুদিবো হামাক্কাই চিদোত।
জিত-বাত আগে, ঠেব!
মেঘে-মেঘে ধুজ হেব!
পরান বলা জাত,নানা ভাগ
বাজি থা পুরিবোই বেগে হবাক!
জিন্নেই লিগিবাক বিজক,
নজিন্নের লো বাজিবো জিন্নের আদত।
বাজি ঠেবার লারেই যার
লোরবো মনর নিত্য সমার,
আলা মনান তাত্তে নয়
জিংহানি যার নিবিলি-ঝার।
বিজগর পদত আদা পুরিবো
থা পুরিব জাদর টান,
বামত পল্লে গরা পুরিবো
পরানত্তুন বেজ দাঙর হাম।
অজল মোনোর অজলত
আভা এব মনানত
জাদর মেয়ে লুগি থায়
নিজো জাদর বিজগত।
