চৈত মাজচে পাগানা রোদত
ফাদি যিয়ে মর আওজর দুদুক্কো
চেঁঙে বু শুগেই যিয়ে
হেঙগরংয়ান পুগে হিয়ন
আননো ধুজ্যে বেলাবো
হানা উয়ে তবলা জোড়াবো
চিত্রেংবাত্রাং উয়ে গীদর সজপদর
উড়ি নেজিয়ে গীদর উগির
বৈজেগো চিলো বুয়েরে
আগর দুক্কেন আর গম ন লাগে
মনে ন হয় আর গেবার গীদ
ন উদে আর মিদে সুর
নেই আর ইক্কু সে আগর দিন।
আজা এল গীদ গেই হাদেম জিংহানি
হুজি রাগেদিম মানেয়র মন
নেই মর হবালত।
গোজাদে লাগিবো বহুত সময়
মর গীদর সজপদর,
লাগিবো মর মানেয়র বল।
হি দিন এল আগে, ইক্কু হি দিল দেগা
এই হিল চাদিগাঙত দুগে হস্তে জিংহানি হাদা পরে
ভাঙি যায় দোল আজা, মিদে স্ববন
ন পুরায় বেতাল্লে চোগর পানি
আঙি যায় পরান মনর দুগে
হরান এলে বারিজে তোগেই
বারিজে এলে জারহাল তোগেই
জারহাল এলে আরও হরান তোগেই
ন পেই হোন হালত সুনজুক।
আজি যাদনদোন মিদে গেংহুলীর লাম্বা ধেক
নেই আর সেই লাম্বা ধেক ধরিয়ে
নেই আর সে আগর ধুক্কেন
হেঙগরং, ধুদুক আর বাজি র।
মন আগে মর ধন নেই
বল আগে মর সেদাম নেই।
ইয়ানি হোনদিন একজনর হাম নয়
বলদিদি আদাআত্তে ধরাধজ্যে গরি উজা পরে।
বানেবার চাং গীদর উগির
থুবেবার চাং গীদর চজপদর নুঅ গরিনেই
বল দি পুরিবো তোমার বেগত্তুন।
নুঅ পদে আদিবার চাং মজুঙে
নিবুলি কাদা জার হাজেনে
পিবির পিবির বলপিয়ে বুয়েরত
পিয়ো পিয়ো সিক হারি হারি
মিধে মিধে গীত গেই।
সালেন মর আজা পুরন অব হি না?
গায় গায় দ হোন জাগাত হোন হিত্তে
হোনদিন আদিনেই ফল ন পায়
সিত্তেই তোমাত্তুনও আদা পুরিবো ম লগে ধরাধুজ্যে গরিনেই
আদত হেঙগরং বাজি ধুদুক লনেই
এজ যেই মুজুঙে সাজেয় জাদর রীদিসুদুম।
