পরছাল- পর্ব-১
দানদারেং এ পাগানা রোদ,বিলো সংমদ্দে উবোমরা গাজত ইক্কো হ জিরেন নেয়ে গুরি দগরের । পদন দি ভুদি হানাত গুরি দি জন মানুজ আদি যাদন ,পুগেন দি ভালুদ্দুরোত সুর সুর গুরি ৭-৮ বো সুগোরি গাজ চোগোত পরে । দিবুজ্জে রোদোত এক দুরোত্তুন চেলে গাজসুন গিরগিরান্দে ধক্কে মনে অয় । পুক হুল আর পজিম হুল ,দিয়ান মিলেনেই অক্কান আদাম ।নাং বড় আদাম ।আদামর পুগোত্তুন পজিমেন দি যেবাত্তে এক্কান লাম্বা নাল উজু পথ আগে ,এক মেলো হম নয় । পদর দি হেত্তে ধান ভুই আ সংমদ্দে দিবে বর বর বটগাজ । উজোনি- লামোনি গত্তে যাতে আদাম্মেউনে জিরে পারন সনত্তে বটগাজসুনো তলাত দেন অঘির আগে ।অঘির আনি হুরে এক্কান জুরো-পানি ঘর । ভুদি বোলা মানেইউনে বটগাজ অ তলাত লুঙোন দি ,তুলফুল অয় সং ঘাম্মোন ।আটবয়োচ্চে গুরি এক জনে হমরত আত্ দিনেই লাম্বা লাম্বা নিজেজ টানে ,চোখ জোলেয়ে গুরি পদর এ মাদাত্তুন উ মাদাত রিনি চায় ,ঠুগুরি তলেত্তুন টেপ টেপ গুরি দি তিন ফুদো ঘাম পড়ে ।লগে ইক্কো হারগচ্চে গাবুর পো ,অগিরোত এলান দিনেই বোই আগে ।গানজা হানিলোই ঘাম আনি পুচ্চে পুচ্চে হয় ,হাক্কা বজ না ,আহি থেই অগচ ?আটবয়োচ্চে মানুজ সো আজতে গুরি বজে ।
পিবির পিবির বোয়ের বায়,চোগো পাদা নি সিমে এজে ।এক রিন্নে গুরি সুগোরি গাজচুনো মোক্কে রিনি চে থায় ।দো জনে হাক্কন বোয়ের অ নালত পিঠ পাদি থান ,হুজি হুজি বোয়ের এ হিয়ে আন জুরে নেজায় ।কদক্কন থেনেই বটগাজ ঝুবুরো সেরে ইক্কো অগলক ডুগুরি উদে ,র শুনি তোদাগুলো টনটোনে উদে ।গলা টজ সুগে যায়,অমহদ পানি হাজে ধরে ।আটবয়োচ্ছে মানুজ সো হারগচ্চে পোবোরে হয় ,যাদে নিগির এক্কা হুত্তিবো আনদোয় । নিগিরে ধনে জুরো পানি ঘর আনত জেনেই চায় দি হুত্তিবো উবোত গুরি আগে ,মু বেঙা গুরি হয় পানি নেই হাক্কা । আটবয়োচ্ছে মানুচ্চো হবাল চিদে গুরি মুআন ভেগেদায় ।হন জনে আর হদা নহন ,হাক্কন পর দো জনে পুগ মক্কে আদা ধরন । আটবয়োচ্ছে মানুজ সো নাঙ অলদে অনিল হুমোর ,সিগোন চাগোন অক্কান ব্যাবসা গরে ।বয়জ বারিলে ও এজ মোক নলয় ,এক হোদায় হলে বুড়ো গাবুর ।গাবুর হালে এক্কাউক্কু রাজনীতি গত্ত বড় ইক্কো নেতা অবার ও আওজ এল হিন্তু বাস্তবতা আ সময় অ লগে লগে বেক রাঙা সবন সাধচ্চে ঐ যেয়ে ।নানা ভেজালে মোক পর্যন্ত লনা নঅয় ,তবে ইক্কুনু তে মনে মনে যে তোগে চায় হন রগম ইক্কো পেলে অব ।
ইক্কু তার এক্কানই ধারোজ আগে ,মোক ইক্কো লোনেই সাধারন মানজো ধক গিরিজ তি গরানা । দিবুজ্জে রোদোত সুগোরি গাজসুনো সেরে এক্কান তোন মাজ্জে ঘর সিমিত সিমিত গুরি উদে ।নিগিরে ধন দাগি সে ঘরআনত এজন ,ভুদিউন লামেনেই চেয়ারত বজন ।১৫-১৬ বজচ্চে ইক্কো গাবুর মিলেই হেবার পানি আনি দে ।এক্কা লাজাং লাজাং ভাব,মিদে চেঙেরা ।নিগিরে ধন মক্কে চেনেই মিদে গুরি আজে ,নিগেরে ধন চিত্ হোদোলে নেজায় ! চিদো বুদু দিঘদিগে দে !হি আগে সে আজি বোত ?নিগিরে ধন হবালত ফুদো ফুদো ঘাম জমে ,যুদিও রোদো ঘাম লগে সিনি মিজি যায় হেনেয় হার চোগোত নপরে !হোনোদিন হয়ত বেজ কধা নঅয় তবে অনামিকারে তার অমহদ গম লাগে ।হোজ ও পায় হিন্তু অনামিকারে পেবার হোদা তে সবনে ও নভাবে ।মনহদা মনত থয় বাস্তবতা বুঝি !অনামিকার বাপ চাগরি গরে ,মা চাগোরি গরে আর নিগিরে ধনর ?হনজন নেই !বেগ মুলুক মুলুক্কুন উহুলে পার ওয়োন বোউত আগে ,বানা বেগ নিগিরে নিগিরে ধন এ হুলোত আগেদে ।দি বজর আগেও তার আজতে ইক্কো এল হিন্তু ইক্কুনু চোবাসাল মাজারা তোগেলে ও পেদ নয় ! সনত্তে নিগিরে ধনে অনামিকারে বানা দুরোত্তুন হোচ পে যায় !
যে হোচপানা থায় মনত ,বুগো ভিদিরে আন্ধার ঘরত ।যে হোচপানা বেল মু নদেগে ,মুওন দি ফুল ওই নফুদে ।যে হোচপানাত উবো মরা গাজ ধক ফুল ফুদিবার হন আজা নেই ,যে হোচপানার হন ভবিত্ষত নেই । এ হোচপানার হয়ত হন মূল্য নেই হিন্তু তাও দ তে হোচপায় ! নানা হদা ভাবদে ভাবদে হদহ্মন ওয়ে হবর নপায় ,সুনিল হুমোর অ র বো শুনি উজ ফিরে ।তে নিগির বেল্লে তাঙুরিবে নি ?ইত্তুক ভাবি নিগিরে ধনে সিরে তিগুত গরে ।ঠিক আগে সালেন বেল্লে এক্কা হাম বল দিজ ।সুনিল হুমোরে আর হিচ্চু নহয় ,আজতে গুরি সিংগোবান দি নিগিলি যায়োয় ।সুনিল হুমোর অলদে অনামিকা বাপ ,আদাম মুরুব্বি ।মানজোলোয় ইজেব বারা হদা নহয় ,আদাম্মেউনে ও চোগোত বাজান । নিগিরে ধনে রেদোত সুনিল হুমোর দাগিত থায় ।ভাত হেনেয় ঘুমোত পরে ।বেন্নে ঝাদি ঘুমোত্তুন উদি পজিম হুলে আদা ধরে । বটগাজসুনো তলে বুজি হাক্কন আভা হায় ,মনে মনে দিবুজ্জে হামানি ঠিক গুরি লয় ।তে ঘরত লুঙোদে লুঙোদে বেল বাজ মুলো উদে । নিগিরে ধন অ ঘরান নিত্য বন্ধ থায় ,হুব হম দিনোয় আগে যেক্কে সিংগোবা দোরোত লাগারা দে নথায় ।বারেত্তুন চেলে সারা ঘর বিলি মনে অয় ।হিন্তু হয় জনে হবর পান ?
নিগিরে ধন ঘর হনদিন মানেই ছাড়া নঅয় ,যুদি নিগিরে ধনে ঘরত নথায় তাও ! নিগিরে ধনে গায় অলে হি অব ,তা ঘরত হনদিন মানুষ সিনে নপরন ।হুব হম দিনোই আগে যেক্কে তার হেবার চিদে গরা পরে ,অক্ত অলে গায় গায় হেবার জিনিস লুঙেগি !ঘর আন ভাঙা ভাঙা নজরত নলাক্কে অলে হি অব ,তা ঘরত রঙ ফুর্তির হন অভাব নেই ।জু হারা ,ফেলাস হারা ,হিজেক ও উগুরে হিজেক ,মদ হেনেই নানা বাবদর নাটক ,রন্ধক চলানা , সন্দবাজ মাদানা হি নেই তা ঘরানত ?নাজ গান বেক্কানি আগে ।তা ঘরান অলদে আদাম গাবুজ্জেউনোর সর্গ । ইনিত্তে নিগিরে ধন দিন হাল যেত্তোমান হারাপ অবার হদা , সিত্তুন বোউত গমে হাদে ।নিগিরে ধনত্তুন হিন্তু অক্ত অক্ত অমহদ বিরক্ত লাগে ।যেক্কে মদ হেনেই বিজ্সনত উগুলি দোন ,যেক্কে পিদেপিদি বাজেনেই ঘর হুন ওঝোরে দোন সেক্কে তার অমহদ বিরক্ত লাগে হিন্তু হি গুরি বো বেক্কুন সমাজ্জে মানুজ ! হয়েকদিন পর হদা । নিগিরে ধনঅ ঘরর সুদোম অনুযায়ী ৭-৮ জন গাবুজ্জে থুবেয়োন । দিবুজ্জে মাদান ,তেমন র স নেই ।এজ তে ফেলাস হারা এক্কা এক্কা জুমি উদেত্তে !চাং গরাগুরি চলের । হদহ্মন পর ইক্কো আধা বয়োচ্চে মিলে নিগিরে ধন ঘরত এজে ,গাবুজ্জে দাগিলোয় মিদে মিদে গপ মারেগি ।
হদা বাত্তা শুনি বুজো যায় তে গাবুজ্জেউন দোয় অমহদ সদর ! সদর মানে অমহদ সদর ,পেদা মা হলে আদাম গাবুজ্জেউনে এক নাঙে চিনোন ।নচিনিবাক হেনে ?যেক্কে আদাম গাবুজ্জেউনে গরম পানি নপেনেই আঘল পাগল অন সেক্কে গাবুজ্জেউনোরে হনা গরম পানি দে ?আদামত একজনোই আগে যে হনদিন হাল্লে আদে ফিরে নদে সিবে অলদে পেদা মা ।এ সনত্তে পেদে মা নাঙান নিত্তো গাবুজ্জেউনো মুও ফাগাত বাজি থায় । তবে পেদা মা হিন্তু মাগানা নদে, বদল পেবাত্তে দারবো ফারা,টেঙেরা ভিরি দেনা ,চাঙ দে বল দেনা ,ধান মারা আর নানা বাবদর হাম গুরি দে পরে । এজচে হানক্কনত্তে যে এচ্চে ,যেবার হাদাল্লে হিন্তু ঠিগোই হাম বাজে দি যেয়ে ।হামান বেজ ধাঙর নয় ,বেল্লে মাদান হয় ইক্কো হুরো ধুরি দেনাগোই । বেল্লে মাদান নিগিরে ধনে বেরা লামে ।পদত অনামিকালোয় দেগা অয় । নিগিরে ধনে লাজে লাজে পিজের গরে ,হুদু যর ?তোমান দি জাংঅত্তে আয় । অ ,তে হেত্তে নাহি ?হেল্লে আমি মানুজ ভাত হাবেবং ,বা হয়ে দে বল দিদেগোয় বেলে ।
অ ঠিগ আগে আয় ।আর হন হদা নঅয় ,অনামিকা লারে গুরি ফেরত যেয় ।নিগিরে ধনে পিজেন দিত্তুন চে থায় ,অনামিকারে তার বারি দোল লাগে । রেদোত নিগিরে ধন ঘরত বেক গাবুজ্জেউন থুবোন ।মদ হুরোত বজন । বেক্কুনে গুল গুরি বজন , সংমদ্দে পেদা মাত্তুন পেয়ে তিন্নো মদ বদল আ এক হোদোরা পুজ্জে আঙোর মাজ(মদ হাজি) ।হয়েক জনে পিজের গরন তে হুরোউন হাজতে ধুরি দু ?সাদন এ হয় সুনিল হুমোরত্তে ,মানুজ ভাত হাবাত্তে ।চিগিরেদ ধুমো ইরি দেদে দেদে মনত্তুক এ হয় ,তা ঝিবোরে বো চা এবাক্কে নাহি ?এক জনে হয় হন তব্বাব ! ম বাপ মান ?সিবে দ ম সোর !বেক্কুনে আজি উদোন ।আসলে এবারত মিত্রিগোত তা ঝিবো গম গজ্জে হেনে ই সুনিল হুমোরে মানজোরে ভাত হাবাত্তে ।বেক্কুনে পোল্লা ফিরে ফিরে মদ হান বানা নিগিরে ধনে নহায় ।তে ও ফাগত মিজিলুন হিন্তু তার দ হেল্লে বেন্নে হাম বল দে যা পুরিবো সুনিল হুমোর অ ঘরত ।তে ঝাদিমাদি ঘুমোত পরে ,তা সমাজ্জেউনে বদল সেজ নঅয় সং পুজোত্তুন নউদোন ।রেত সম্ভাক অলে গোদা আদামান জুরোয় হিন্তু নিগিরে ধন ঘরত্তুন Aশুনো যায় রেং ও উগুরে রেং ,মদ হেয়ের সন্দবাজ আ সুর নেয়ে গান ।
