লুকদি আগচ তুই যিদু
——–হেগা
পরানী, মুই দেগং তুই লুকদি আগচ-
বারিজে ঝর ফুদোয় ফুদোয়
মোনতুগনো উমউম আবায় মিজি থিয়্যে হুয়োয়
ছাবা ওনেই পন পানি তাগলকত
নানা ঢঙ্গে রানজুনির সাত রঙ্গে এগত্তরে।
পরানী, মুই দেগং তুই লুকদি আগচ-
পেক্কোমুরি ওয় ফাওনে ফাওনে
পিবির পিবির আবায় নাজং নাজং ঘিলে লুদিত ফুল্লো সাজি
হরান্যে দিনত ঝরা ঝরা পাদাত
চর্বেক গাজত ভালুক্যে মার ছ’ ওনেই।
পরানী, মুই দেগং তুই লুকদি আগচ-
হাল্লোং ভরন কুজি কুজি মামরা বুগত
জুমত বিজেয়্যে ফাগানা চিন্দেরের তুম্বাসে
সুজমরিজর কাঁজা বাচর দগে
বাজার ফেরত পজা বাচ্চুরির মিদুক্যে লগে।
পরানী, মুই দেগং তুই লুকদি আগচ-
ঘর পোড়া মাদিত চাগুত্যে ভাদপিলে্র হরলা বাজে
শহরে বন্দরে পঞ্চাশ টিক্যে সান হাদ-বেহাদে
মূল্যহীন বেদমা কলাছড়া ওই সারা বাজারত পুরি থাক্যে
একমুদ সুগত্তেই একবুগ বিশ্ব্যেষ ভাঙ্গদে।
পরানী, মুই দেগং তুই লুকদি আগচ-
একমুদ হুদত্তেই ভেয়ে ভেয়ে হুজ্জ্যে চর্চানীত
নাগানাক্ক্যে কোচপানার বেসঙ্গুল্লে ভাগে
পধে ঘাটে এড়েইয়্যে লাঙ্গর গংর লগে
লিভটুগেদার কালচারত দরমর কোচপানার রাদত।
পরানী, মুই দেগং তুই লুকদি আগচ-
মুরো ফারি পেট্রোলিং’অ পধে হাত্যের হানাত অধিকারর যুদ্ধত
রাজপধর প্রতিবাদী মিছিল-ঘে্রাও-অবরোধত বুগত হাদি বানি
রণ কাবি যিয়্যে গোয়ার গীদ সুরে
শত্রু লোয়ে নয়; জাদ ভেইওর লোয়ে কালা মাকালী ওনেই হলি খেলাত।
পরানী, মুই দেগং তুই লুকদি আগচ-
সময়ে সময়ে ফেইসবুগত স্টেটাসর আপডেটত
বাস্তব জীবনর সুঃখ-দূঃখানি উগুলি পরানাত
বাস্তব-ভার্চুয়াল জিঙ্ঘানি দ্বিমুখ্যে গংর লগে
ফারক অদে অদে এগত্তর_ এগত্তরে ফারক অবার অওজত।
========
১৯ জুন, ২০১২ ইং
