চাক্মা রুপ কথা, কবি আর ধবি- ১ম পর্ব
ভালুক বজর আগে দি জন বুজ্জে-বুড়ি এলাক। তারার কন মরদ পোহ্ ন এলাক। বানা ইক্কো নিদুক্তুক গরি চিগোন ঝি এল। সে ঝিবো পরী দক্কে দোল এল। ভালুক বজর বিদি যেনেই বুড়ো হালত ঝি পেনেই বুজ্জে তা ঝিবো নাঙ্গান রাগেল “ধবি”
বুজ্জে লোই বুড়ি দি জনে জুম গরি হেদাক। জুমত যদবদে ধান অদাক। দি জনে গদা বজরবো হেনেই ও হেই ন ফুরেদাক। তারা জুমত ধান হুজদে সে সমারে গচ্ছে, সুদো, সগরিগুলো, চিন্দিরে, যেদেনা নানা বাবত্যে গুলো-গুলি বিজি হুজিদেক। সে গুলো-গুলি উনও হেই ন ফুরেদাক। যারে হই দোল জিংকানি হাদাদন। বুজ্জে-বুড়ির দোল সংসারত আদেক্কে গুরি হালা ছাবা পরিলো। তারার এল দুগো দিন। হেনে দুগো দিন এল সেয়ান সালেন শুনো…………………
একদিন্ন্যে বুজ্জে লোই বুড়ি জুমত হের, আরালা-হরলা হাজা যেয়ন। সক্কেনে জুম ধান গাচ্ছুন হাদমূলো অজল অয়ন। ধান গাজ হাদমুলো অজল অলে হের হাজের দিলে জুম ধান আর বেজ পাই।
জেদ মাজ। বুজ্জে লোই বুড়ি জুমত বেন্ন্যেত্তুন ধরি হের হাজাদে হাজাদে বেলান দিবুচ্ছে অয়ে। বুজ্জে লোই বুড়ির জিরেবাত্ত্যে হন হিত্ত্যে ছাবাও নেই। যা গাচ্ছুন আগন সিগুনো পাদানি জুম পুরদে পুরি যেরে। নুও গরি পাদা মেলদে আরও ভালুক দিন লাগিবো।
বেজ গত্তনা পানি সুগেনেই বুড়ি বুজ্জেরে হল “যেই না ইক্কিনা জুম লেজাত্তুন পানি হা যেই” যদবদে পানি থাজ গরের। পানি হত্তি বোও ঘরত্তুন পুরি আন্দে পুরি ফেলেয়ন। বুজ্জে যদবদে হাম্মো মানুজ। একবাগ শেজ ন অলে ন উদে। সে নত্ত্যে তে বুড়িরে হল “আঃ আর ইক্ক বাচ্ছে থাক, এ বাগকো শেজ অলে যেবং। ইন্দি বুজ্জের গত্তনা পানি সুগেলেও বাগকো শেজ ন অলে ন উদের।
বাগকো শেজ অনেই বুজ্জে লোই বুড়ি পানি তোগা লামিলেক। হুদু পানি…………। জেত মাসছে ফাগানা রোদোত বেগ সুগেই যেয়ে। পানি তোগাদে তোগেদে ইক্কান জুরো জাগাত পরিলাক। সিয়দও পানি নেই। বানা হরিঙ হুজত ইক্কা ইক্কা পানি বদি আগে। বুড়ি সে হরিঙ হুজ পানিয়ান থুত্ত হুবিনেই ইক্কিনা পানি হেল। সে ইক্কা পানিলোই তা গত্তনাবোও ন ভিঝে। ইক্কিনা পানি হেনেই আরও বেজ পানি হেবার ধারাজ অল।
ইন্দি বুজ্জে তোগাদে তোগাদে ইক্কো জুরো পানি মোরোং পেল। মোরোঙ পানিয়ান দোল জুরো পানি। বুজ্জে ইল অইসং জুরো পানি হেল। বুড়ি তারে দেনেই হানি হানি হল “বুজ্জে মরে ইক্কিনা পানি হেবাত্ত্যে দেনা” ইন্দি বুজ্জেত্তুন পানি হানা ইল ন অর। বুড়ি আরও বুজ্জেরে হল “বুজ্জে মরে ইক্কিনা পানি হেবাত্ত্যে দেনা”। বুড়ি বেজ ভেজাল গরের হেনেই আদেক্কে গরি হল “দুর………র………”
