তাগল লনেই হান্যে রাম এ
জার বেড়া গেল,
মনে মনে এক্কান তে
বুলি জাগা তোগেল ।
ঘুরতে ঘুরতে তে এক্কান
বুলি জাগা সোত পেল,
এক্কেনা গুরি হাবিনেই তে
জাগানরে পাং গরি এল।
গম বার চেনেই তে
জুম হাবা ধরিল,
সপ্তামুলে শুগেই শাগাই
আগুন বাজে দিল।
আগুন বাজেই দিনেই তে
জুমান পুড়ি গেল,
দোলে দালেন পুড়ি যেনেই
মনত শান্তি পেল।
বাজার ফিরি হান্যে রামএ আরা হারা ধরিল,
আরা হারা থুম অনেই
বিজ বিজি ছিদিল।
লারেগরি জুমত তে
নানাক্কান হুজিল,
সময় এনেই সিয়ানি
বুলি গরি উদিল।
দেবাবো আবাদা গরি
লাম্বা দর ধরিল,
হান্যে রামর জুমান
লারে গরি এইল ফিরিল।
লারে গরি হান্যে রাম এ
জুমান চুলিনা ধরিল
জুম চুলানা থুম অনেই
মু চেবে চেবে আজিল।
হান্যে রামঅ জুমত ইক্কু
হোনো হিজচুর রাদ নেই,
চিত্ বুজে তার বেক হিত্তেন্দি
তা জুমান রিণি চেই।
হুমোরো,চিনদিরে,মামমারা
আমিলে, বেগুন, পুজি,
সাবারাং, গুজচে, যোদোনা
ইয়ানিলোই তা মনান হুজি।
লারে গরি তা জুমানত
ধান পাগা ধরিল,
গম ইক্কো বার চেনেই
ধান হাবানা পাং ধরিল।
ধান হাবা থুম গরিনেই
বজর ভাত পেল,
গোদা বজরর গুজচে দুঃখানি
বেক পুরি ফেলেল।
হান্যে রামর মনান ইক্কু
হুজিয়ে গীত গার
এ দুক্কেন গরিনেই তে
জিংহানিয়ান হাদার।
