বয়ের অ আভা হাদে হাদে দি জনে গপ মাদির ।ভালুক দিন পর দেগাদিগি ,পরানর সমাজ্জে ।স্কুলো জিংহানী এক লগে হাদেয়েয় কলেজত উদিনেয় ফারক ।এক্কা ছাবা পুরিলে দি জনে হাই স্কুলো ছাদ উগুরে উদিলোংগোই ।সবায় হিচ্চু নহেলে মু পানজা লাগে সনত্তে ৫টেঙার বাদাম হিনিলোং ।ছাদ উগুরে উত্তে ভারি যুত ।ছাদতানত আবেরেয়ে গুরি ইক্কো কৃচন চুড়া ফুলগাজ আগে ,সিন্দি উদিলেগোয় অয় ।স্কুলো মুজুঙে ইক্কো বড় মাঠ,এক ঝাক সিগোন গুরোই হারা হদন ।
ম সমাজ্জেবো নাঙআন অলদে বিচ্চিং এ !ইয়ান তা আজল নাং নয় সমাজ্জেই দে নাং ।হদা হদে হদে মেরে হল ভেই তর আগন্দে ননে ?মুই এক্কা আজিলুং বুজিনেই ও পিজের গল্লুং হি ভেই ?আ হি,লাং দে লাং !ইক্কো বড় নিজেজ ইরি দিনেই হলুং নেই নেই ভেই আমন অ হবালত নেই ,ইক্কো পেদুং দ হবালত ঝিগে ফুল ফুদিলুন !সে অকতত সিগোন গুরোউনে রেং হারি উদোন ।চাংগে মাঠটোর উহুলে গুরোউনে গুল অনেই থে আগন আ হাক্কন পর পর রেং হাত্তন ।বিচ্চিং এ হয় ধুর যেএ যে গত্তসাত ,আমা হাম আমি গুরিই ।আমি আর হোদা হো ধুরিলোং ,তাত্তুন হবর পেলুং মাজমুলো আগে তারা আদামত্তুন ইক্কো মিলে আজসে !মিলেবো চিটেগাং অট পত্ত ।মাজমূলো আগে বেলে ভুদে লুগেয়োন !
ভুদে লুগেয়োন মানে ?বিচ্চিঙে ভাঙি হল ,ভেই চুচ্চেং ,
ভুদে লুগেয়োন মানে অলদে গেল্লে মাজত ভারসিটিত পত্তে পত্তে চাগাহুলো ঝি বো নেই অয় যেয়ে !ইন্দি তোগেলে নেই উন্দি তোগেলে নেই !ফোন বন্ধ,এম্বা ইক্কো মিলে হুদু গেলয়ো উদুনেই ।থানাত জিদি গচ্চোন হন হবর পাত্তা নেই !মিলেবো সুলুম
রাঙা আগে ,চাদে হারাপ নয় ।গোদা বেগ আদামানত
হবর ওয়ে চাগাহুলো ঝিবোরে বেলে চুচ্চেং নাগে হেয়োন্দোয় ।
বেক্কুনে চিত্ পোরা হাদন আঃ বেজেরি বোরে অজাদর
গুত্তিউনে মারে ফেলেনেই হুদু থোয়োন দোয় সি ।
তা হদা শুন্দে শুন্দে মর
ম্যানহোল,ড্রেন,পানি টাঙ্গি আ নানা চিগোন সাগোন
গলিত মরা পানদে,সে হবর অ হোদা ইদোত উদে ।তে আর
হর ,এইতো গেল্লে সাপ্তাত থানাত্তুন হবর এল দে চাগাহুলো ঝিবো ভেলে চুচ্চেং নাক্কোই গিরিত্তি গরেল্লোই !
মুই হিচ্চু হোবার সময় নপেলুং !সিগোন গুরোউনে হো হো গত্তন ।চাংগে ইক্কো হাবর ভুদিলোয় চিগোন গুরোউনে বোল হারা হেলদন ,মাঠতো উহুলেত্তুন ইক্কো মিলেই কয়েকজনরে মাদি দোলালই ইদে দি দি লোরার ।চিগোন
গুরোউনে সোত্তুন সোত মিলেবোরে পাক হাবাদন আ
পাগলী,পাগলী…….বাজার পাগলী….বাজার পাগলী হনেই
জোল গত্তন !হয়েকজন বুড়ো মানজে জোগার পারিনেই
গুড়োউন ধাবে দিলাক ।আমি ছাদত্তুন লামি এলং আমারে দেনেই পাগলী হানি হানি আমাদু বিচের দের,চদে ধন অজাত্তে গুরোউনে ম
পরান্নেরে লাজ্জোন্দে……যাগা দে ভারাল-আদুরি নিগিলে দোন !সেন হয়েও হানিভুদিবো আজা গুরি গুজুরি গুজুরি হানা ধজ্জে ।গুরো উন আর থুবেয়োন দি,হুজতো হুজতি গত্তন! এরেয়ে হুল গুরি ইক্কো গুরোই হয় মগদা পাগলি ত
নেক্কো হোয় ?সেন হনেই এক্কু ধাবা দে অন্য গুরোউনে কিদিক কিদিক আজন ! গুরোউনোরে চোখপিজি রিনি চেনেই এক্কা দুরোত
সুরি যান ।পাগলী আ ইক্কো ভুদিত্তুন ইক্কো আতপুরন্নে সুলুম আ ফ্রক ইক্কো নিগিলেই আমারে তে দেগায় ,বুঝি পারিই সুলুম্মো ওয়ে তা নেক ,ফ্রক্কো তা ঝি !
ফ্রক্কো চুমে ,হোদা হয় ।হাক্কে আজে হাক্কে হানে ,নানা হোদা হয় । গুরোউনে হো হি গত্তন সুলুম হমলে মানজো নেক অয় অ ?সে হদাআন পাগলী হানত ঠিগই লুঙেগই,পাগলি বইদেত্তুন থেই, যিদ্দুর বল আগে সিদ্দুর তোদা আজি র সারিনেই হয় চোখ থেনেই হি নদেগত্তে মর নেক আগে,মর পো আগে ,মর ঝি আগে ।বুগোত হাদি নেই ,পিনোন ঘুন পজ্জে সাবোগি দেগা নযায় ,চুল
ঝিন্দুরুক হিন্দুরুক,হিয়ে যোগা মাদি……দেলে মনে অয় এক্কা আগে তে বড় বড় ঝড় বোয়ের
ফারি ফারি এচ্চে ।বিচ্চিং এ মরে হুজতোয় আমি আদা ধুরিই
এত্তে এত্তে পাগলী রবো শুনো যায় ,তুমি তারারে দেদা নয়,তারা দেবংসি,তারা ম লগে থান,মল্লোই হদা হন……।দোগানত এনেই
ইক্কো মানজোত্তুন হবর পেলুং লুংগুদু গন্দহুলোত
পাগোলির নেক,পো,ঝি, আরেনেই পাগল অবার হদা ।হিজু এক্কান ইদোত উদি ইক্কো পিদে পেগেত লোনেই পাগলিরে দিবাত্তে যাং,চাংগে তে মাঠ পার ওনেই
বিলো পত্তানন্দি যার ।লগে তার
নেক,পো ,ঝি….না না তুমি দেদা নয় তুমি চোখ থেনেই ও হান,তারা দেবংসি ,পাগলি তারাল্লোয় এগা মনে হদা হয়
।সাজন্নে অয়ে পাগলি মিলে যায়োয়
সাজন্নে আন্দারত ,মুই দোগান
মক্কে ফিরোং মনানে গায় গায়
হদা হয় ,হেত্তে যানি মর মনে অয়
চেরো হেত্তে আজার আজার দেবংসি ধুপ সাবা !
চাগাহুলো ঝি বোত্তুন হিজু এক্কান পিজের গুরিবার চাদন……….!
[দেবংসি=দৈবিক]
[ধুপ সাবা =মুলত অদৃশ্য ছায়া,পাগলী যিগুনদোয় হদা হয় সিউনরে দেগা নযায় সনত্তে ইয়ান হো ওয়ে]
