।। চাঙমা ভাজ ।। বাসু দেব চাক্‌মা

।। চাঙমা ভাজ ।।

পিবির পিবির বয়ের অ লগে ,
ফাগুনো আভা যেক্কে বায় ,
মন হুনোত তুম্বোল উদে
হোগিল পেক্কো হুন হুনে যায় ।
হান পাদিলে শুনো যায়,
চাঙমা হোদায় গীত গায় ।

মাদি বুলি নজান দে
‘মা’ সিগেয়ে যে ভাজ ,
সেন অল মর মা-ভাজ ,
পরান জুরোনি চাঙমা ভাজ ।
হং হদা মুই মন হুলি ,
আওজ জানাং দোল গুরি ,
মা সিদু মুই নোনেই গরং ,
এক হুরেন দি থোনেই লাজ ,
র সারি সারি হং মুই
ম পরানর চাঙমা ভাজ ।

সবনর হিল চাদিগাং
নো পরংঅর বড় গাঙ
চিদো বুদু দিগ দিগে উদে ,

যেক্কে শুনোং তার নাং ।
মুরোয় মুরোয় বোয়ের অ নালত
জুমো সেরে টং ঘরত
মানেয়ুনে গেই যান
চাঙমা ভাজর গান ।

পুগোন দি অজল অজল মৌন

পজিমে আগে ধজ্জে ,
অরুনাচল,মিজোরাম,
আর অ আগে নানা নাং
দশ লাখ মানেয়ে গান
চাঙমা হদায় গান ।

মৌন মুরো সং জাগাত,
বাজি থায় মুও ফাগাত ,
রন হাবে এক তালে
চাঙমা ভাজর গীত গেলে ,
মৌন মুরোই সুর তুলিলে
মানেয়ে সুর ভুল গুরিলে
সুর মিলান বাজ-গাজ
র সারি বেগে হন,
পরান জুরোনি চাঙমা ভাজ ।

মৌন মুরো যার মা বাপ
যা হিয়েত বাজি আগে
জুম্মো রক্ত বাজ ,
তারাই হন চাঙমা ভাজ
নপেই হন লাজ ।
জুম্মো দেজর মানেই অনেই
যাত্তুন গরে লাজ,
হদে চাঙমা ভাজ
সিবেই অল জারগো পো
চাঙমা জাদর লাজ !
মানেয়ে দ সেপ ফেলেবাক
ত পরিচয় যেক্কে পেবাক,
চাঙমা ভাজর গীত গেয়েউনে
তরে দেলে ঘিনে বাক ।

নিজো ভাজ নপারি তুই ,
শিহ্মিত যে হলাজ ,
হবর হি পাজ তুই ?
শিহ্মিত তরে হদে ,
বেহুবে ও লাজে বাক ।
মা পিত্তিমি লাজেব ,
তরে জাগা দেদে ,
বাজ গাজর ও মু ফুদিবো
তরে জারগো হদে ।

মা তরে জু জানাং
সিগেয়োজ মরে ভাজ
যে ভাজত বাজি আগে
মৌন মুরো জুমো বাজ ।
রন হাবি উজে যেম
র সারি হোই যেম ,
ইয়ান অল মর মা ভাজ,
পরান অ মুরোত্তুন হং মুই
পরান জুরোনি চাঙমা ভাজ ।।