(১)
বেল ডুবোং ডুবোং,ছড়া পারত বর সেমেই গাচ্চোত টদেক্কুনোর হিজিক-হাজাক চলের । সেমেই গাজর এ ডেলাত্তুন উ ডেলাত দিবে চগদা লরালুরি গত্তন । গাজ গোরাত মালা বাজ উন্দুরবোর ঘুম ভাঙে,আজতে গুরি গাদ বারেন্দি এজে । হুরেহারে ধান চবাউন রিনি চায়,গোত্তাল হয়ইক্কো ধান চোগোত পরন । ঘুমোত্তুন জাগিনেই তা লাংওনি ও গাদ বারে এজে । দিজনে মুলুক মুলুক বেই দিবে-তিন্নো ধান মৌত দোন,তে জুমোনদি আদাহ ধরন ।
রেত্তোবো পেট ভরন ধান হান,জুমোত চরন । পত্ত্যেআমল্লে যেক্কে পেঁজাবো ডুগুরি উদে সেক্কে ঘরত লরদোন । বাজ বননদি গুরি জুরিয়ে জুরিয়ে তারা উজোনিলামোনি গরন,পেজাবোরে বেলাপ দিনেই । বাজ বনত হাক্কন ম অন,গপ মাদন,বুঝিপারন বাজ বনান ঘুরঘুরে বুদুলি যার । সেমেই গাজসোত এত্তে এত্তে সেরাংমেরাং অয়,লগে হিজু ধান আনন । দিননোবো গাদ ভিদিরে ঘুম যান,রেত অলে জুমোত । ইনিরি দিনুন হাদি যান ।
(২)
বজরমুলো পর্অ হোধা,জুমোত হিচ্চু নেই বাজ বনানিত বাজগুলো ধুরি যেয়ন । হুরেহারে বেক উন্দুরুন ছ ফুদেয়োন,হেয়ে বেজ ওয়োন । মালি উন্দুর বো ও ছ ফুদেব ! যিনদি যেদ সাত হেবার হিচ্চু নেই,নো হাওন্নে এলে হি হেবাক ? একদিন অক্ত গুরিনেই তারা সেমেই গাজসো সারিনেই মানেইয়ো আদামত এজন,এক্কান ঘরত বা বানান দি ।মনে মনে হুজি অন,হাজ্জে থিগে ধান পেনেই ।
মালি বাজ উন্দুর বো ছ ফুদোই গুনি গুনি চের বো । দি জনে মিলিনেই ছ উন রিনি চান,ঘর্অ বিলেই বোত্তুন লুগি লুগি থান । মালা উন্দুরবো একদিন আমক অয়,কাজ্জেবো ধানুন ঝুজঝুরে ফুরদনদোই । ঘরানত জোল বাজ্জে,ঘর বুজ্জে হবালক আত্ দিনেই বই থায় । যেদক দিন যায় মানুজসুন মু আনি সেধক হালা অয় ।
(৩)
হয় এক দিন বিদি যায়,ইক্কে উন্দুরুনোর রেত দিন নলাগে.ঘরঅ জোল শুনি শুনি অব্যেজ ওই যেয়োন । যেক্কে সেক্কে হাজ্জেবোলোই উজোনিলামোনি গরন । ঘরঅ বিলেই বোও নেই ওয়ে দি একদিন ধুরি । সিদিন্নে দিবুজ্জেমাদান মালা উন্দুর বো এক্কান হোদা শুনি উগুরি উদে,ঘরঅ সিগোনগুরো বো তাম্মারে হর আঃ আমা বিলেইবো যুদি আক্কা ডাঙর অদ ….. !
হাক্কন পর চাই দি বুজ্জে ববক ববক একপিলে গরম পানি ঘরঅ হুননোত তারা বা বো উজু ঢালি দের,মালা উন্দুর বো ডুগুরি উদে……
মালি উন্দুর বো হনরগমে নিগিলে এজে সগুন ঠান এবাদে । দি জনে ঘরত্তুন ডেই যান,যাদে যাদে শুনোন বুজ্জে হর,মগদা উন্দুরুন নিজোর হেবার নেই তুমি ভাগ বজগিদি !
ইক্কো উবোমরা গাজত তলে এনেই জীরান দি…..গাজ উগুরে ইক কো হ মরা র সারি উদে জিককুরু কুক……কুক……কু ।।
