ন যেম আর মুই, এ দেজ ছাড়ি,
ন যেম আর মুই এ জাগা ছাড়ি।
এ দেজর জুমে জুমে লেগা আগে ম নাং,
মৌন মুড়োর য়েলে য়েলে মিজি আগে মর ঘাম।
পুরোনা ঘর পাদা,বিজগর পাদায় পাদায়
তোগে চেজ-
মৌন মুড়োর বুক চিরি তাংজাঙানি
রিনি চেজ-
চোগো পানি ফেলেব, হব সি ম হদা!
বড় পরঙে ভেইয়ে ভেইয়ে ফারক,সাক্ষী কাপ্তে গোদা।
এ মন দুগোর হদা মুই পুরি ফেলেদুং নয়,
এ পুরোনা ঘর পাদা মুই আর ছারি যেদুং নয়।
ন যেম আর মুই, এ দেজ ছাড়ি,
ন যেম আর মুই এ জাগা ছাড়ি।
এ দেজর ঘরে ঘরে বার্গি পেগোর পজ্জন আগে,
চিগোন দাঙর বেগ চোগোত আহ্জার আহ্জার সবন আগে।
হালা হালা মৌনো পিদিত দোল দোল আদামানি
বেরে চেজ-
ঝারে ঝারে পাদা তলে হোনায় ঘোনায়,
মেদিনির বুক চিরি চেজ-
বুক মিলিনেই দেগেব,হব সি পুরোনা হদা,
আহ্জার ভেয়ে ঘুম যাদন বুগোত বানি জাদর হোদা।
এ সবনর হোদা মুই, পুরি ফেলেদুং নয়।
এ মন আঝা মুই, মিজে অবার দিদুং নয়!
ন যেম আর মুই, এ দেজ ছাড়ি,
ন যেম আর মুই এ জাগা ছাড়ি।
এ দেজর বুগোত- আর্মি,সেটেলার,বুন্দুগো মুওত,
১২ বার মারান হেয়োন আহ্জার আহ্জার বাপ ভেই,
“ঝাবান” হেয়োন মা ভোন,গুরো-বুড়ো ঠিক নেই।
জুলি উদি রন মুওত,বাজে রাগেয়োং মর চিন।
নদিম মুই সে চিন, হারি নেযেবার!
নদিম আর মুই ম নিজো নাং, পুজি ফেলেবার।
জনম জনম দুরি আগং,মৌন মুড়োর এ দেজত,
-হাদে যেম জনমান।
লারেয়োত যুদি পরানান দে পরে ,
সাক্ষি ওই থেছ তুই মা পিথিমিয়ান।
