আবাদা আবাদা গুরি পুজোর জাগে,
মনান হেনান্যা অলে গম?
ভিজে মাদি সান হন ক্যানভাস?
সাত রঙা রং তুলি!
নাহি-
টিপ টিপ্পে ভরন পহন পানি?
ভিজে মাদির নরম ক্যানভাসত,
মন হুজিয়ে সাজেলে সবন,
রঙ তুলিত রং দিনেই,
ফুদে তুলিলে রান জুনির সাত রং।
সবনর মিঝেলে বানেলে,দোলোর দেবংসি গরন!
হালিক-
সবনানি যুদি ভাঙি যায়!
মাত্তল বোয়ের মনান যুদি বুদুলি যায়!
ভিজে মাদির ক্যানভাস চুগে যায়!
রঙ তুলি নিজো রং বিজগর পদত আহ্জি যায়!
হি অব?
মনান হি ফুদিগো ধক ভাঙি ন-যেব?
আওজোর ছবি হি বিষ-কাদা ন অব!
সবন ভাঙানার দুক,
বুগোত পাত্থর বানি-
দুগোর বিষ জনমান ছিদে যেব।
সেনে-
আবাদা আবাদা গুরি পুজোর জাগে,
মনান হেজান অলে গম?
বোয়ের ধক হন ধন?
না পেলাং বেয়ে শিলো হো ধক পহন!
মনান যুদি বোয়ের ধোক অয় ,
হেনে রাগেবে সে ধন?
এক জাগাত দ বানা নথেব!
সের পেলে বুরো মনা ধক ধেই যেব!
সে বুজি নবাজ্জে মন, হিয়েত হেনে থেব!
সেনে হং-
মনান ওহ্ক টিপ টিপ্পে ভরন,
পেলাং বেয়ে শিলো হো ধক পহন।
ফুদোই ফুদোই দুক্কানি পরোক,
তুম্বোল তুলি পহন পানিত মিজোক।
পেলাং বে দি চোগোর তানজাঙ লামিলে,
-দুক আর নথেব।
আদং হাজর পল্লে পরোক!
সবনানি ভাঙি গেলে যোক!
বিদি যেয়ে অক্ত লগে,সে আদং ধো যেব!
ভাঙি যেয়ে সবনানি পেলাং বে গেলে,
-আদং হাজর আর নথেব।
সেনে হং-
ম মনান ওহ্ক টিপ টিপ্পে ভরন।
পেলাং বেয়ে শিলো হো ধক পহন।
ভারি পহন,গোভিন হন মরং!
মানেই ভালেদোর ধনে, চুক চুক ভরন।
