যেদোক দিন মুই বাজি থেম
এই হিল চাদিগাঙৎ
জনম জনম এ দোল জাগা
বাজি থেব মোর মনত্ ।
এল এল জুমো ছেড়ে
আদি যেব যেককে রাঙা গাবুরী
পিদিত ইককো বুককে হাললোং
পিননে রাঙা পিনোন হাদি।
মনত তার হুজিয়ে
রাধামন ধনপুদির গীত গাই
এককা এককা তারে তারে
পিচছে ফিরি হারে তে রিনি চাই।
চেঙে, মিয়িনি, হাজলং
মিজি আগে বর্গাঙত জিঙিরি
মিজি আগে মর্ মনান
হিল চাদিগাঙত সিঙিরি।
এল এল মোন মুড়ো
চিগন দাঙর ছড়া গাঙ
যেদক দিন মুই বাজি থেম
মনত থেব হিল চাদিগাঙ্গর নাঙ।
পুগো হিততে সাত রঙ মিজে
রানজুনি উদিলে,
ফাগুনোর কোকিললো যেককে
মিদে সুরে দাগিলে।
চেঙে, দুধুক , হেংোরোং,
বাজি র শুনিলে,
রাধামন-ধনফুদির
পালা গীত এদোত উদিলে।
জনম জনম এই দোল জাগা
বাজি থেব মর মনৎ
যেদোক দিন মুই বাজি থেম,
হিল চাদি গাঙত্ ।
যেককে শুনিম মিদে সুরে
গেংুলী আর উবোগীত
জুরে যেব সেককেনে
মর পরান চিত্।
চিব চরনর লামা মুই
জনমান শুনি জেম
জনমান মর এদোত থেব
যেদোক দিন মুই বাজি থেম্।
