আন্ধার আংঅচ্চে হিয়ে সন মজ্জে
অরলে চাবের ঘুমোত,পরানে সতপত্তে,
ঘন নিবিলি ঝাড়,বেল পহর নেই বানা আন্ধার
পেক-ফুট চেক-চেগিলি নেই হন আড়
নিজেজ বন অর পজা বাজে বোয়ের যেক্কে বার ।
সিরে লামোনি পিদো সং এক চিল্লে জুরো,
হিজেক অ উগুরে হিজেক সাত্তন মিলি গুরো-বুড়ো ।
হন অসুরোর আত্ ভাগুদো উরোর পরান ,
হিজেগত পরান যার,হাত্তে এজের মরনান ?
বিজগর পাদা ফারি বিজক ফেলে যার ,
হিজেগত বিজক অর হবালত লেঘা যার ।
সলং বেড়ে হিয়েত,বাজি মিজে মেয়েত
জাগি হং সবন দেগংঅর,ইক্কু দ গভীর রেত !
রেজ্যত রাবন অ শাসন,চাংঅর তামাজা
মুজুকসুক গুরি বোই আগং নেই বেলে-আজা ।
শ্যামলক অ চাম হিয়েত,মিজি আন্ধারত
সলং বুদুলি মিজি যাংঅর ঝাগত,যা থোক মনত !
ঝিমিত ঝিমিত জ্বলদন জুনি নয় হায়েনা চোগ !
একবার তোগে ফের তোগাদন লেত্তো-ফেনা মুওত ।
উগুরি উদোং চেলে মানেয়ো বাজ নেই হিয়েনত ,
মিজে আজা দি মনানরে বুঝোং আগং সবনত ।
