চেরো হেত্তে উরগুন্নে গরম
হিয়েত নিগিলের ঘাম বাজ ,
ভালুক দিন ধুরি গাদানা নঅয়
চিদে গত্তে বার মাজ ।
হবাল চামত ভাজ পুরিলো
বারা চামত চাড়া বানিলো ,
ধেলে লাজ নে পেলে লাজ
বাবু দ নবুজে,মর নেই টেঙা গাজ!
হিয়ং অর মাসিক চান্দাউন
ম পরান্ নের ইস্কুলো টেঙা ,
দি নবাল্লুং দোগান অ বাগী
ভগবান,হেনে সুজিম দেনা ?
ছাগল ইক্কো বিজিলুং
ধান বিজিলুং কয়েক লেই ,
বাবুরে দিলুং অর্ধেক টেঙা ,
দেজ জাদ হদা ভাবিনেই ।
বেজ দেরি নঅর বারিজে এল
এক লেজা ঝড়ে মেরে গাদেল ,
হিয়েদ আর ঘাম বাজ নেই
যে দ মুই দুগোত আগং !
ভারি অভাব,হেবার চোল নেই ।
ঝড়ত ভিজে পড়ে মর
বড় বড় ঝড় অ লেজাত ,
ভারে নবাল্লুং মর আগ নাং
জুম বোলার জাত ।
থোতথোজ্জে ঠেং দর অয়
বাবু দাগিরে দেলে ,
ফিরি এব মর আগ দিন
জাগা জমিন ফেরত পেলে ।
গুরুং গুরি দেবা পারাক শুনি
রেক সম্ভাগত দিগিলুং জুনি ,
পরান ঘর গির গিরে উদিলো
ফলনির হানা নি যেক্কে শুনিলো ,
মনে মনে হলুং ও ভগবান !
দেবা চিমিদোত নিলে হা পরান ।
ও দা !ঠেংঅত ধুরি হংঅর ,
শুনিম তোমা বেক হদা !
ইয়ান মর নয় ,ফলনা বাব হদা ।
ফোলোনা ডাঙর পোবো স্বাধীন এল
হদা বাত্তায় ,চলনে ফিরনে ।
বাবু দাগি সুমুরিলাক তারে
হেত্তে তারা হদা ন শুনে !
অকত দ এজের আর অ
গাজ পাদা ঝুড়ি যার ,
গাঙ অ পানি রাঙা অব
হবালত শুনি আগে যার ।
দুগোত্তুন দুগোর অর ,
মুজুঙে এজের যে দিন
হেল্লে পজ্জু বাবু এলে
বিজোর হুরো বো গজে দিম ।
এজচে মর বারি দুগ
হালা এমান পলাক্কি জুমোত
সেক্কে মরে বল দিবাক ,
বাবু আগে এসি রুমোট !
গম ওহক আর বজং ওকহ্
বাবু রিনি চায় জাদরে
আদাম জোগা নো নো সোবাচাল
সাজন্যে অলে দর গরে ।
হালা চোকসামা চোগোত দিনেই
বাবু ঘুরের যিন্দি পায় ,
শত্রু ভাবি ভেই ওরে মারের
গম বজং চিন নপার ।
জার হাল দ পুরিলোগি
আগুন ফোবার গাজ নেই ,
মরা পুরিবার গাজ দোংগোই
উত্ তো দারবো নিনেই ।
বাবু হদা ভুলিবার নয় !
হংঅর বুগোত ধুরি ,
চোগো পানি জম্মে গোদাত
দে পুরি বো ইরি ।
বাবু তুই বোউত গজ্জোস
হংঅর আত জুর গুরি
ভেয়ো রক্ত চেবার নচাং,রল হোজুলি ।
দিবার মর আর হিচ্চু নেই
হানিম মুই দে বোল ইরি ।
