নোনাবি,তুই মরে নহোজ-
হোরানত তাদি ঠেয়ে হোরোলি চর’উনোর
পানি ধাজ মারেবার!
মুই ওঝার ধোজ্জে নয়!
নয় বারিজেত গং দাঙর গাঙ!
হন তান-জাং!
সেনে মুই পাত্তুং নয়!
নোনাবি,তুই মরে নহোজ-
আগাজ রিব রিব তারা’উন আনিনেই
ত আহ্দত গোজেই দিবার!
মুই হন গোজেন নয়!
নয় দেব বর পেয়ে
যদে পদে হাবিল জাদুকর!
সেনে মুই পাত্তুং নই!
নোনাবি,তুই মরে হ-
বেন্নে পোত্যার শিরো-পানি’ত ভিজ্সে
লাজুরি ফুল তরে আনি দিবার!
ত পিদিত,বুগোত,মুওত,উদোত
জুরো ফুল বাজে দি শিজ-শিরে তুলিবার!
-মুই পারিম!
নোনাবি,তুই মরে হ।
হন এক বেল্লে মাদান
আহ্দে আহ্ত দুরিনেই,চোগে চোক রাগেনেই
মন হোদা হোবার।
আঝি যেবার দোল সবনত!
গোভিন রেদো জুন পহরত,
ঘর ইজোরত বা উদোনত বুজি
আমক ওই ত হোদানি শুনিবার!
তরে বুগোত বেরে উম গুরি রাগেবার!
-মুই পারিম!
নোনাবি, তুই বানা সিআনি নমাগিচ,
যিআনি হনদিন পারিবার নয়!
যিআনি হনদিন ওবার নয়!
