মনবি,
মনত তর রঙ ছিদোক
পত্যার বেল উদোনা,
মন হুজিয়ে ভুরি থোক তর
সাজন্যার বেল দুবোনা।
পরানি,
বারিজের ঝড় লগে ধোই যোক
ত মন দুক্কানি,
চুক চুক ভরন ওই পুরোক,
ত মন আঝানি।
মেয়েবি,
মেঘ চাগা সমার ওক তর
চিক চিক্কের বে অক্তত,
হোগিলুনে গীত শুনোদোক তরে
মন বজঙর সময়ত।
ধনবি,
দোগিনোর আভায় আভায় ফাগুন এযোক
তর জিংহানিত,
ত আঝির রঙে রঙে ফুল ফুদোক
তারুম ঝারানিত।
রোজসেবি,
বেল দিবোরত সমার ওক তর
সোনালি গাঙ চিল,
বেক দিনুন ওদোক তর
পত্তাপুত্তিক রঙর দিন।
নোনাবি,
দিন্নোবু হাদোক তর
দোল মনর হুজিয়ে,
ইদোত তুলিচ মরে বানা
নুও বেল উদিলে।
