মালাবান্যে। দীপক চাক্‌মা

Print Friendly, PDF & Email

হি গরং, হি ন গরং এদককি পিজের গরজ,

মালাবান্যে চক্ষুনন্দি দেগজ না ন’দেগজ ?

বড় মু’অ গরি দ পাত্তোলি ধুজ্জচ, দোলেই দ’ ন’নেজাচ ,

ইন্দি উন্দি ধুজ হাবেনেই আধা পদত ডুবা হাবাচ ।

বারেন্দি গেলে অজ, “ধুরি আন্যে অগলক” ঘরত থেলে ‘রাধা হুড়ো’,

ধরি ন’জান্যে গুরি হিত্তেই ধুজ্জোচ তুই জুম্ম জাদর লুড়ো ?

ধুনুং ধুনুং আগুন লুড়োবো আধা পদত মুর গজর,

উজু পধে ন নেজেনেই বেঙা পদননি হিত্তে নেজর?

নাক হান গরম গুরিনেই মুওত নেগেলর ফেনা,

বেজাতিউনে আমারে নিত্য মারি জাদন হেনা।

ইজচে এক্কা, হিল্লে এক্কা নিত্য তারা জু তোগাদন,

সুজ বরাদে বরাদে তারা হুড়োল ও বরাদন।

আমা জাদর মা বোনুন, চোগনদি পহর দেগদন,

নি’জ জাদত নেক ন’পেনেই পরিয়ে জাদত তোগাদন।

রিদিসুদুম লুগেই দেদন আ’র দেদন লুগেই জাত,

মুরদ পুরি চিনদে গরলে বিরং বানা মুই দাঁত।

অজিত হোদা হ’দ গেলে অজ আমনো উরে বেঙা,

মান সম্মান ন’চিনোজ তুই, চিনোজ বানা টেঙা।

সেদাম নেই এক্কায়ু তর, আ’র মিদে গুলি ভাত হানা,

“যিয়ান চোগনদি পহর দেগজ সিয়ান তুই গর”- ন’গরিম আর মানা।

পরিয়ে আলু হুড়োজ তুই, নি’জ আলু ন’হুড়িনেই,

হিত্তেই পাত্তোলি ধুজ্জোচ তুই ধরি ন’ জান্যে গরিনেই?

পি’য়ি হর বিষ’র পানি, মনে গুচ্চোজ মিদে রস,

মালা বান্যে চক্ষুনন্দি হিত্তেই ন দেগচ?

Share This Post

Post Comment

This site uses Akismet to reduce spam. Learn how your comment data is processed.