*দোল*
—হেগা
দোল গাভূরী দোল বাঙুরী ফিন্যে দোল পিনোনান
যেন লাগের ভারি দোল তার সামুলেজা চাবুঘী দোল রাঙা পেলোর হাদিআন
দোল বেইনর ব’ কাধি দোল
দোল লাগে বিয়োং-থুরচুম পিচ্চোল,
দোল লাগে তিরিং দোল
চিড়িং মিলে হিয়ে পিচ্চোল
হন্না বেগত্তুন বেচ দোল হলেব
দোলে দোলে নিত্য বাঝান কোঁল।
মুনঝুক দোল অলে দোল মনুচ্ছর মন
হুলুক দোল চিনোন বেগে, ন অলে মনান ফন।
লাগে দোল সিধা মুআন
দোল সুলুম পিন্ন্যে মানেই দোল
দোল জুমক্ষেত দোল দিঘিলে দোল লাগে ঝাড়ান
দোল দেঘং মুরোমুরি দোল ছড়া-গাং
চিরোহিত্তে দোল কোন রাদ নেয় দেঘিলে আরাং
পিত্থীমিয়ান দোল, দোল মুখবান
পর্যটন দোল, দোল উজু বিল্ডিং ঘরান
দোল লাগে চোঘ পানি ন চিনিলে বিজগ, ন চিনিলে আরাং।
দোল দোল দেক্ক্যে দেক্ক্যে দোলর রাজা কন্না বেচ চিন্যে
বেগত্তুন বেচ দোল দেঘিবা,
দেঘিলে পহর বেলান পুত্তে বেইন্ন্যে।
দোল্ এ্যাল্ মোন, দোল্ জুম্মদেঝর জুমঘর
লাং দোল্ পেলে কোঁচপানা মেইয়্যে
দোল্ লাগে জাদর এগত্তর, দেগিলে এক লাঙেল টেগেইয়্যে।
লিকলিক্যে দোল্ ঢিঙিশাক্
তারুম্ দোল্ তারাবন
সাজুন্যে বেল রাঙা দোল্
দোল্ সাজুন্যে তারা উদিলে আগাচ্চান্,
চোঘত্ দোল্ হানক্কন্যে জামেই তারা
আঙোচ্চেত্ দোল্ আদাম পহর ঝিমিত ঝিমিত জুনিপুক্
শেয়াল্যের রেং দোল্ শুনিলে লাগে হান্ সুগ্।
হরান্যেত দোল্ কড়ল্ল্যেচরত ফনকুয়ো পানি
চাক্কোছড়াত শিলো ছেড়ে দোল
ইজে-মাছ-হাঙারা চিলিকবিলিক বেড়ানি।
চান্নুয়া রেদত নানু পজ্জ্বন দোল
সরল হিয়েয় দোল উদোনত পুরি থানা
বেগত্তুন বেচ্ দোল লাগে রেংহারি গেংহুলি গেয় আদাম বেড়ানা।
জুমত দোল ফুজি-সাবরেং কজি
কজমা বাচ্চুরি দোল্ তোন যিয়ান আগা কুজি
দোল মুরিচবাত্তে চিদোল শুগুনি দলা কাট্টোলমুজি,
দোল হুজি কলা পাদাত দোল পদনা-হক্কেংআফউল
হেলে জাত্যে সুউত লাগে হেবাং গুরি উন্দুরকান-সামুউল।
দোল লাগে মামরা চিন্দ্রে তুমবাস
দেলে দোল ফাগানা ধান
বারিজের ঝড় ফুদো দোল, দোল উড়েত্তে নাদেংবুত্তি
দোল লাগে কালা দেবা যেক্কে এব বান বজরপুত্তি!
কলাপাদাত ভাত পোয় দোল সুউত ঘুংরো হলায়
দোল লাগে শুগোনো এরার সুত্তেবাচ্চানি
ঝালাব্বর মিঝেল দোল হরোই দলায়।
বারেং ভরণ দোল জুম্ম তোনপাত নামিলে বিল্ল্যে বাজারত
হারাহাচ্চ্যে দোল ওল লাগে
ঢাগাঢাক্যে কিনিয়্যে মানুজর জোল
অং দেঘি ওল,
দোল তোন বেজা যায় এগোমুদে ঠিগে
চোঘ পহর মালিক্যে মা দোল
ঠেবরক হেয়্যে জুম্ময়্যের বেজার মুগে গেইল
দোল দুনিয়া দেঘে বেগেয়্যে।
হোল বুদিলে দোল ঘরান অয় ওলঝোল
নিত্য বাজে হুজ্জ্যে চর্চ্চানি
ভাগ সংগুল্ল্যে অলে দোল বাড়ে মেইয়্যে ছিদিনে তুমবাসচ্চানি।
দোলর কধা হলে দিন
ন’ অব এচ্চে থুম
দোলর কধা কধে কধে মত্তুন এযের ঘুম!
বিগিদি গুরি নাক্কুদিমালোই নিলোচ গালিলুং
তুম্বাস, তুম্বাস স্ববন দেগি সাত স্বর্গ বেড়েলুং!!!
____________________
———হেগা
(১৭ জুলাই, ২০১২ ইং)
