|| গাবুর ||

মুই অহ্’রান ন অং!
যেক্কে দেগং বেন্নে রাঙা বেলান!
রেদোর পোত-পোত্যা জুন পহ্’র!
আঝিন’ওর ধুপ মেগ,ওঝার দেবা!
অজল মৌন,জুরো গাজ-অ সাবা!

মুই অহ্’রান ন অং!
যেক্কে দেগং ধজ্জের কার্মা(Blue)-
নফুরেয়ে এহেল,এগেলা নাঙেল!
মেয়েবি হালা চোগ,
রান-জুনির সাত রং!

মুই অহ্’রান ন অং!
যেক্কে দেগং উরগো চিল,
লারেয়োর আগুন! রাঙা ফাগুন!
বোয়েরত মাত্তল গোটি(Kite)-
মৌনো চুগোত মেগ!

মুই অহ্’রান ন অং!
মুই আঝা নছারং!
মর এজন দে দিনুন বেক্কুন নো!
ন-পুরেয়ে বেক আঝানি মত্তে নো!
বেক ভাঙি যেয়ে সবনানি মত্তে নো!

সেনে মুই অহ্’রান ন অং!
বানা নো দিনোর হোদা হং!
নো দিনোত নো সবন দেগং!
মুই নো, হুজি এহেল ঝাবুর!
মুই দ হজমা জনমান গাবুর!