সুক তারা বাজি বার
জুনো পহরান মাদে যার,
হুজি হুজি বোয়েরত
উরোং উরোং মনানে-
নাজি নাজি যার।
হন নুদি আঝিবো
হন মিদে সবনত,
এজে ফিরি মনানত
হাদি বেরে পিনোন পিনি-
নোনাবি, দাগি দাগি যার।
সুক তারা বাজি বার-
রেদো জুনি পহর সিদার,
ভারি হুজি মনানত-
দোল দোল সবনানি
বাজি বাজি যার।
সুক তারা বাজি বার,
গোভীন রেত বারি যার,
গাবুর জুনো পহরানত
এচ্চে মর মন হুঝি-
নোনাবি,ঝাদি ঝাদি আয় ।
ফাগুন রাঙা মন হায়,
স্বর্গ রেজ্য আভা বায়,
দি চোগো মুজুঙোত-
রাণী সাজি নোনাবি
তুই, আঝি আঝি আয়।
জুনো পহর অ লগে হায়।
হোচ পানা দাগি যার-
সুক তারা বাজি বার।
