জুনপজ্জে সন্দবাজ ।। বাসুদেব চাক্‌মা

Print Friendly, PDF & Email

জুনপজ্জে সন্দবাজ

জুন পজ্জে উদনত,বড় আঙচ্চে মুআনত
বাবে আগে বুজি পো তার মুজুঙোত ।
নিরিবিলি বোয়েরত দেবা পারাগর র ,
লাজে মুরহুজি আগে পুদে,বোয়েরান ওয়ে ম ।
পরানর ধন,ভাঙি দোর হিয়া বুড়ো বাবর মন ?
হদক আর আজেবে ,দুনিয়ের মানুজ জন !
হ্মেত এ মরে তুল্লে ভালুদ্দুর ,ডুবেলদে পুদে
হানা হুমোত পানি ধালিলুং নবাল্লুং সিগে ।
শুনি পাদি হান বাবে হর পোর নেই-
জাদমক্কে টান !মনত সুনজুক নেই ।
পানিত দ গেল বাবে যা সিগেল
এজ চে পুদে বাব অ মাধা হেল ।
হি জঘন্য দুজ !পুদো চোগোত পানি,
অগমানে জুর আদে পুদে হল হানি ।
দুজসানি যে হর ভারি ডাঙর সিগের জাঙর,
নিজোরে পিজের গর ,বা সিনি হি গায় মর ?
নিজো ভাজ রিদি সুদোম আগে বিজক ভুরি,
মু ছাড়ি হানত নএজে রাগেয়োচ বুগোত গুরি ।
ঘোরবো গাজত পরসাল বাজে দি নগরজ হি ভুল ?
পরসালে বেরেলে হেনে ফুদিবো জাতীয়তাবাদর ফুল !
লাগেয়োজ গাজ গোড়া তুই নহাজাজ
লুদিত লুগি যেয়ে গাজত ফল পেবার চাজ !
বুলেট ওই ফুদে বুগোত পুদোর এ হোদানি,
বাপ পুত জুরো বোয়েরত বাজ পাদার হজহজানি ।
হীরে ওই জুলি উদে চোগো হনাত পানি ,
মুঠ ভিরি উদে পুদে পুজি চোগো পানি ।
জুমোর উজু উজসে ভুলো হেত্তোলি ,
গাঙত ভাজি ধজ্যেত এই ধুরি নজানের পাত্তোলি ।
তুচ্চো তুচ্চো অয় এলে বারিজে ঝড় ,
পুগে হেয়ে বেদে বান্নে জুম বোলার ঘর ।
ঘর উন্দুরে হামারাদন ডোগা বাজ অ বের ,
জুমোত ইক্কু ভারি বলি সং জাগা হের ।
হমরত গুজ বানি উত্তোক জাগি বেক্কুনে
চুচ্চেং তাগল নাঙল অর ফাল ওক-
ফল ফোলোক সিরি দোক সং ভুয়ো জাগানি ।
বাবঅ ভুল পুদে পার ওক,যোক উজোনি
বাবে পথ দেগে দোক ধো ওক হেরানি ।

————————
হেত্তোলি -চাজ গুরিয়ে/কৃষক ।
পাত্তোলি -হাল ।
ডোগাবাজ -হুজি বাজ/অপরিপক্ক বাঁশ ।
ফাল – নাঙলের ফলা ।
তুচ্চো তুচ্চো -ঝিন্দুরুক হিন্দুরুক/ধ্বংস/চুরমার ।

 

Share This Post

4 Responses to "জুনপজ্জে সন্দবাজ ।। বাসুদেব চাক্‌মা"

Post Comment

This site uses Akismet to reduce spam. Learn how your comment data is processed.