বিঝু,
লেখকঃ- ভগদত্ত খীসা
বিঝু এলে হুঝি হই বিঝু আয়-বিঝু আয়
কদ বিঝু গোঙি গেল ন ফুরোয়-ন ফুরোয়।
ভাত জোরা ফুল ফুদি ঝার তল ভোরি যান
ভোঙরা আ পাগে-পেগে নানা দিক পাক খান।
ধক জুদো বোয়েরান লাহ্ রে লাহ্ রে বোউ যায়
মোন মুরা, ছরাছরি, বিঝু হধা কোই যায়।
গাঝ পাদা লরে-চরে, ডাগি যায় কোগিল্যা
খিল্যা আগে ধান ভুই চরে বগা-বগিলা।
মোচ চরে, গরু চরে, বাজি যায় ঘন্দি
সোজ-রঙা আগাঝত মন যায় কুন্দি।
ফুলবিঝু যেই দিন ডাক দিলো রাদাবুয়া\
আজু লগে হ্দাঘং, গাঙ পথ হুয়া হুয়া।
ছরাকুলে গঙারত বিঝুগুলো তোগেদুং
দুগ লাগে মনানত তোগেই কিঝু ন-পেদুং।
বুরো আজু ছড়া হুলে এক লদা পানিলোই
মন্দর জপি যায়, হ্দু পারি বোই বোই।
“ঘরখনাথর পানি পড়া, মীন নাথ বর
পানি পরা খেব যেই, অক্ষয়-অমর”
সেই পানি ফি বঝর খেই খেই ম আজু
বিরাসি বঝরে ম,ল (ও সালাম জু জু)।
চুল তার কাজা রোইয়্যে, দাত বেক ঠিকঠাক
সেই দিন কুধু গেল, – দিন বেক ফুরেবাক
মূল বিঝু যেই দিন গাদি-গুদি সাজদং
ধানে-হুদে ভারালোই আদামত বেরেদং।
ভাই বোন গুরো গারা এক লগে সমারে
“অয়-অয়” কুরা ডাগি- খাবেদং আদারে।
হুম্ হুম্ পানি লোই বুরো-বুরি গাদেবাক
ঘরে ঘরে যেই যেই গুরুজন মাদেবাক।
একবাচ বেল হ্লে মন যায় পাজনত্
খই-দোই ফল-ফাল খে যেবং আদামত।
হু্মে হু্মে জগরা ধুগে-ধুগে মদ খেই
বেরেবাক ঘুরিবাক ঘর ঘর যেই যেই।
রংধং হাঝি-রঝি গদা দিন গঙি যায়
আদামত বিঝু দিন ন ফুরোয় ন ফুরোয়;
সাঝ হ্লে গাঙ ঘাট, দিঙিসাল, গোলাঘর
বাত্তির ছদগে হো্ই গেল পহ্র পহ্র।
রেদ্ হ্লে নিঝিরেত্ বেগে মিলি জাগিদং
বঝর বুয়া বিদি যায়, নুও বর মাগিধং
গুরো বুরো জুর্ হাদে বর মাগি ইচ্ছর
আর য্যান ফিরি পেই রং-চঙা এ বঝর।
বিদ্রঃ এই কবিতাটি ১৯৮৩খ্রিঃ হিল্যো সাহিত্য সংসদ গ্রুপের প্রকাশিত “বিঝুফুল” ৩য় সংখ্যায় প্রকাশিত হয়।’
বারী দোল পেলুং কবিদেবো।