“এহ্ যুগর আত্যিয়ার” বুদ্ধ জ্যোতি চাক্‌মা

Print Friendly
আহদংঅর মুই মুজুংঙে, দিগল পদ দুঅরি।
 নুঅ দিনঅর নুঅ আহজালোই, পেলাং বেয়ি গুরি।
 এহুল ওহুল স্ববনানি, থিলি নেযাই মঅরে।
 টেঙর হুজ মুজুঙ বৃত্ত্য, পিস্সি নঅ পঅরে।
 দুগেহ দুগেহ বিদি যাদন, দিন রেদ বজর।
 হুল নঅ পেয়ি আন্দার পানিত, লাগেদে সাজুরঙঅর।
 ইদত উদে নানান হদা, চোগো পাদাত ভাজে।
 লোহ উদোরে দুগর পানি, চোগো হনাত এজে।
 যেক্কে দেগং জাত ভেই, দুরি দুরি মাত্তন।
 মা বোনর ইজ্জতলোই, হারাহ্ হেলাদন।
 ঘর দোর একসাদিয়ে, আগুনে নেজার হেই্।
 ওমা হদা রঅ সারঅদন, জাহগা ভিদে আহরেই।
 রণ হাবি উদে মত্তুন লাহরেই গুরিবার।
 আত্যিয়ার বৃত্ত্য মন নঅ তঅরে, মুজুঙে উজেবার।
 চোখ হাদিলে ইদত উদে, বিদি যিয়ি বজরুন।
 দিন দিবুস্সি স্ববনে দেগঙ, মুজুঙি থিয়ি দিনুন।
 এহুল ওহুল স্ববনানি, তুহলি দে অনসুর ইদত।
 বুলেট লাইসেন্স নঅ লাক্কি আত্যিয়ার, আহওজে লঅ তুই আহদত।
 বুক ফুলেনে লাহরেই গল্লোই, দেজ বিদেজ ঘুরি।
 আরমি পুলিজ হেওই তঅরে, নঅ পারিবাক দুহরি।
 হলম অয়ি এহ্ যুগর, নুঅ এক্কান আত্যিয়ার।
 জুম্ম দেজত জুম্মউনোর, ভালেদি আনিবার।
 জাগঅ জুম্ম জাগঅ, নঅথেয়ু ঘুমত পুহরি।
 লাহরেই গুরি উজোহ বেহগে, এহ যুগর আত্যিয়ার দুহরি।
 যে মাদিত আমি আজার হের, সে মাদিত ভর দি উদি।
 তঅলে পুজ্জি জা্ত্তুরে, উবুরি আনি তুহলি।
 জদাবল আহ এহ যুগর আত্যিয়ার, যেক্কে থেবহ আহদত।
 এবহ সেক্কে ভালেদি দিন, আমা জুম্ম জাদত।
 
 ------------থুম অলঅ-----------

Share This Post

Post Comment

Please Answer.. * Time limit is exhausted. Please reload CAPTCHA.