**নুঅ ছলং**

Print Friendly

২০/১১/’১৩, বুধবার, ১০:০০ এএম

আদামর পুঅ-
যিবের লেঘাপরা সাঙুদোরোত থুম অহ্ইয়ে,
নেইয়্যে বাপ-মা’র জুরনত নেই
অজল সিখ্যা সিঘেবার;
কিজুকাজু থেলেয়ো-
পুঅবুঅর ধাপ নেই,
একতাল নপরিয়ে গুরোগুরির সমারে
তে’য়ো বারী উদের-
অসিখ্যা কুসিখ্যার আরাচাক মাধাত গরি।

আদামর পুরোনী সমাজ, সিদুগোর খাস্যেক
অমকদ’ নিরোজ, কাজর কুসংস্কার
মদ, জু খারা, সয়সাগর ছিনেলী কাম
চিগোনত্তুন ধারি দিচোঘে রেনি
যে চিজি ডাঙর অহ্‌র্ সিয়ানি আহ্‌দত ধরি,
ইত্তুক বয়জত্ তে’য়ো চুঝো ধরে-
বিরি-সিগিরেত-দাবা-তুবি
জেবত গরি ভঙায় গাঞ্জা ভুধি
মদ-কাঞ্জির বদল যেন্ তার পানিকুত্তি!
ছিনেলর লালোজ, চুল্‌চুলি মারানা
বানা সিয়েন আজল, ইক্কো মোক লনা।
ডগা বয়জত গিরিত্তি ধরী, দীঘোল জীংকানি-
অমা পিত্থিমি নঅহ্‌য় দোলে রেনানা,
গ্যেন-বিগ্যেনর অজল সিখ্যা-
নঅহ্‌য় দেঘানা, নঅহ্‌য় সিঘানা।
‘সেধক্যান আদামত, সমাজত মর জনম
চিগোনত্তুন ধারি ডাঙর-দীঘোল সং
দেঘিলুং সমাজ’ ধক্কান, এভ’ দেঘঙর।’

ইত্তুগো ন বদলে, বদল্যা সিস্টেম
আধুনিক কালচারে ঈরুগোর টেইম।
মুই ইক্কু দোল জাগাত, সহ্‌রত থাং,
যাং মু্ই ইস্কুলোত, কলেজ-ভার্সিটি,
পুরোনা কুখাস্যেক ইক্কু নেই, আঘে মডার্ণ সোসাইটি!
কুঝি বয়জত মোক ন লহ্‌ঙ্
লাঙ্যা-লাঙনি গিরিত্তি গরং,
কেলাব’ত্ যেই হেরোইন খেই,
বাউন্নোপাদা তেপ্পান্নো গরি
মদে মাত্তলে মজিনেই এক্কা এনজয় গরং!

পুরোনী সমাজে ন সিঘেই সিখ্যা
সিঘেয়ে মান্‌সুদোম-
দোয়ে-মেয়ে মান্‌সোমায়, ফেলাংবেয়্যে কোচপানা।
ঈরুগোর পরবুঅ মুই, অহ্‌য়োং পাঘারা
গাই মুই, ম’ আলু মুই খুরোং
কারর চিদে মর নেই,
কোচপানার বদলে জানং মুই
যা’ত্তারে মারে ফেলেই।

পুরোনী সমাজে ন সিঘেই বিগ্যেন
সিঘেয়ে বিচ্সেজ।
ঈরুগোর মুই ডাঙর বিগ্যেনী
ধর্ম-পূণ্য সেনে ঠেঙ’ নলাকেজ।

পুরোনী সমাজে ন সিঘেই বুদ্ধি
সিঘেয়ে বিদ্যে।
ঈরুগোর মুই বুদ্ধিবান-চালাক একজন
বিদ্যে চেহ্‌লে কিচ্ছু নেই-
বানা ডিগ্রী বুঘী আঘং।
ন জানং বুনোকাদা, ন গরং ঘর’কাম
ভুই-জুমোর বাগত লামিম্, অমকদ’ লাজাং,
নেই মর কন’ বিদ্যে, চালাক-বুদ্ধি ছারা
সেনে মুই জানং বানা মান্‌সোরে ঠগেই খানা।

পুরোনা সমাজে নসিঘেই বার্বো
সিঘেয়ে সম্মান ।
ঈরুঘোর মুই ডাঙর চেলা, কাররে ন ডরাং
মুই পুন্ডিক মুই মুরুব্বী, সমাজ-জাত চরেই পারং ।
সেনে মুই ন মানং বাপ-মা
মায়মুরুব্বীর কধা,
ন ধরং কার’ উবদেজ, বিচ দেঘং তারা গজ্যে কাম ।

বাহ্‌রেদি মুই ঝোকঝোক্যা, চদক স্টাইল-
কাবরে-চুবরে; দজ ফেলেই এক বাবু,
সিভিল ভালেত্যে কামেকজ্জে;
ভিদিরোর বেক কিঝু গদা ঝগলা
বিনয়ে-সুদোমে, খাস্যেগে-আল্যেগে
বেরা’ই ধজ্যা জগনাগুলো ।

পুরোনী মানুচ ভুলুক-চুলুক ইক্কু মুই কহ্‌ঙ্
যুনিয়ো ডাক-পুন্ডিগোর কধা এভ’ ল্হক ধরং ।
আদামর সমাজ, রিদি-সুদোম ঘিনেই নাক চিবোং
যুনিয়ো তারাত্তুন বেজ সুদোম জুরী ন পারং ।
পুরোনী কোচপানা, মেয়ে-দোয়ে, পুরোনী সীরিসুদোম
এক্কানও ন লহ্ঙ্ মুই, এবাদে লুঙিহ্ দিহ্‌য়োঙ্,
যে সুদোমে মুই চলঙর্, মডার্ণ মরে ভাবং
নুঅ ছলঙে করলাহ্ যুগোত লুদুপুদু আঘং।
====০০০===

র ভেত :
১) নুঅ ছলং=নতুন খোলস
২) ছিনেলী=যৌন; নরনারীর অবৈধ সম্পর্ক
৩) ছিনেলীর লালোজ=যৌনাকাংখা
৪) চুল্‌চুলি=যৌন তৃষ্ণা; চুলকানি
৫) টেইম=time; চাঙমা ঘাচ্ছারাই ‘টেইম’ ।
৬) করলাহ্=নোংরা; অসভ্য
৭) সিভিল=ভদ্র; সভ্য
৮) ভালেত্যে=উন্নত; সমৃদ্ধ
৯) মান্‌সুদোম=মানবতা

Share This Post

Post Comment

Please Answer.. * Time limit is exhausted. Please reload CAPTCHA.