“দেগা অব রাজ পদত”

Print Friendly, PDF & Email
এক্কান নো বাবোদা’র স্ববন দেক্কোং
যে বাবোদার রঙানি বারবো গুরি হয়-
মুই পরত্তুল্লো নয়!
হিল-চাদিগাঙর বিজগর পজ্জন
আঝার মানজোর বুগোর স্ববন
মিঝি আগে সে বাবোদার পত্তি সুদো নালত,
মুই সে বাবোদা হোজা যেম-
দেগা অব রাজ পদত।

পল্লাত পল্লাত গুরি বোয়েরত উরি
যে বাবোদায় হব জুম বোলা হদা,
যে বাবোদা দোগিনো আভাত মিলিবো
হিল-চাদি গাঙর পরানর আঝা;
যে বাবোদা সদক ছিদিবো রাঙা বেল পহরত,
মুই সে বাবোদা হোজা যেম-
দেগা অব রাজ পদত।

হোগিলোর মিদে ‘র’ আগুনোর সুর তুলিবু,
আদ মোজানত আজ্তের গুজুরি উদিবু!
আঝার গাবুরে রাঙা ‘লো’ই বাবোদা সাজেবাক
রোগোনি রাজ পত্তানিত ধুপ ফুল ফুদিবাক,
গংবোলা গাবুরোর লোরবো ঝাগত মিজি থেম
মুই সে বাবোদা হোজা যেম-
দেগা অব রাজ পদত।

—————–O—————–
বাবোদা = Flag

Share This Post

Post Comment