**জদন্‌ঘর’ত বাস্সে থেইম**

Print Friendly, PDF & Email

২৬/১১/’১৩, বুধবার, ৬:৩৫ পিএম

আগাজর ঐ ধুপ মেঘচাগা ছেরে

ওহ্‌ম মুই ছারাল্যাচিল।

যুনি তুই এগালা অক্তত্, গুঝিগুঝি কানে তর মন-পরান

বেরঙা সবনানি তরে লেভেই যায়,

কাদাকাত্যা দুঘ্‌কানি বুক ধিবে দি দে

বনাবনা বনিজেইচ্ যুনি নিঘিলে গদা চিত কজরেই

সেক্কে তুই মরে ঈধোত্ তুলিচ্;

পেবে সুঞ্জুক মরে নাঙ্‌ঈনিলে,

দিজনর আল্হ্যেঙানি আজুল গরি লোচ্ তুই

কোচ্‌পানা নিজেনি চোঘোত্ ভাঝেই।

দুরোত্ ঐ রিপ্‌রিপ্ এহ্‌ইল মোনুনোত্

ওহ্‌ম্ কির্বে সোনাত্তালি।

দাংদাঙ্যা চোত্-কাবারি উমুস্যা খরানত্

যুনি তর্ চিদোভুই ফাদি ফাদি যায়,

কোচ্‌পানার তিরোজে পরান তাক্‌তাক্যা ওহ্ই উধে।

চেরোপালা বোয়েরান্ যুনি থামি যায় নিধুর্ অগ’মানে

সেক্কে তুই আহ্‌দি যেইচ্ গাঙ’পারে

দিআহ্‌ত্ বাভেই পদনাঝুবোত্ ধরিচ্ আল্হ্যেঙে।

মনে মনে মরে ডাগিচ্

ম কধা ঈদোত্ তুলিচ্, যি’নি কয়োং তরে।

ত কোচ্‌পানার ফুল্‌বারেংঙো সিধি থোচ্ ম নাঙে,

ওকুলে জদন্‌ঘর’ত্ বাস্সে থেইম্ তরে।

===০০০===

র ভেত:

১) জদনঘর=বাসরঘর

২) বাস্সে/বারচে=অপেক্ষা

৩) আজুল=অঞ্জলি

৪) নিজেনি=স্মৃতি

৫) উমুস্যা=ভ্যাপসা গরম

৬) তিরোজ=তৃষ্ণা

৭) তাক্‌তাক্যা=অদম্য; রাগী স্বভাব

৮) গুঝিগুঝি=গুমরিয়ে কাঁদা

৯) নিধুর্=নিষ্ঠুর

১০) অগ’মান=অপমান; মনোবেদনা

১১) ওকুলে=পরপাড়ে

==================

Share This Post

Post Comment