“ঘড়ি”

Print Friendly, PDF & Email

ম আহ্ত ঘোড়িবো পুরি এল হনা সেরে
গায় গায় ঘুন পজ্জে আন্ধারত,
নচলে হিনেই নয়!

পুরোনা ঘড়ি,পুরোনা মডেল
বারে ভিদিরে চল নেই আর সেনে।
যুদি ও পরান ঘরান দুগুত দুগুত গরে।
এজ বিদি যেয়ে অক্ত ঠিক ঠিক হোই দে!

এজ্সে ভালুক দিন পর,
চিক চিক্কের দিনহাদি গেল তার;
যেক্কে মুই অলুং-
পুরোনা মানজো ধক পুরোনা মডেলর।

ছিনি নবাল্লুং আর যেক্কে অধিনোর শিগোল,
আন্ধার পাগোজ্জেই শিঙোর ফুদেল মুরোত।
ফুদো ফুদো গুরি পানি জুমিলো বুগোত,
জিংহানিয়ান পল বিপাক জনমর ঘুলোত।

চিক চিক্কে হাদি গেল দি জনর,
পুরোনা ঘড়ি সমার অল মর।
দশ জন বারে চিগোন এক্কান পিত্থিমি,
ঘড়ি আর মর দিজনর পরান ঘর!
মন আ মেশিনোর র,চের দেবালত শুনোং-
দুগুত!দুগুত!..…
এক দুই গুরি গুনোং নিজেচ্চুন,
আহ্জা নছারং, এজ বাজি আগং।

Share This Post

Post Comment