[এ হোচপানা তুই রাগেচ]

Print Friendly, PDF & Email

সাত ধয্যা তের গাঙ ফারি
উরগো ঘোরা পিদিত চুড়ি
হন রাজা পো নয়!
নোনাবি,সাত আদাম চিরি
তেরবো গোলাপ আদত গুরি
শিরো পানিত গাদি সাজি ঠেয়ে হন পদত
আদে আহ্ত দুরি আহ্দিবার হোজুলি লোনেই-
মুই এজ্চ্চোং!
রান জুনি রঙা নুদি মেঘ চাগা ধং
চুকচুক ভরন এ হোচপানা তুই রাগেচ।

নোনাবি শিরো পানি পহন ফুদোউন
সোরা বানি তোদাত পিনি,
হুজি ডোগা লুদি লাজুরি ফুলোর বাঙোরি,
হলা পাদা তদেগর রঙা পিনোন-হাদি পিনি
আহ্দে আহ্ত দুরি দাগাদাক্কে গুরি
জনমান হাদেবার হজুলি লোনেই-
মুই এজ্চ্চোং!
লাম্বা রেদোর নফুরেয়ে তারার সদক
চিতভিজ্সে গাবুর জুন পহরর এ হোচপানা তুই রাগেচ।

নোনাবি,তর হোগিল হালা বেঙা চোগো ভং
ওলোদোর সোনা রং হিয়ের গরন,
গোভিন রেদো আন্দার মেয়েবি চোগোর
মেয়েত বাজি চোগে চোগ রিনি চেই,
মন হদা হোই জিংহানি হাদেবার হোজুলি লোনেই-
মুই এজ্চ্চোং!
ওঝার ধয্যার উদোংতাং তুম্বোল
নায়াগ্রার পেলাং বেয়ে এ হোচপানা তুই রাগেচ।

Share This Post

Post Comment